Un avion Rockwell Sabreliner rumbo pa Aruba misteriosamente a ateriza na estado Zulia

Forza Aereo Venezolano a destrui esaki

ORANJESTAD (AAN): Un avion cu Diaranson den dia a lanta vuelo for di Mexico, y cu riba su flightplan ta poni cu su destinacion ta Reina Beatrix Airport di Aruba... finalmente a resulta destrui riba un pista clandestino na parti zuid di estado Zulia na Venezuela.

   E avion aki ta un Rockwell Sabreliner 65, un business jet cu ta dispone di dos motor jet tipo Garrett TFE731 turbofan.  E avion aki cu matricula XB-RXG cu largura di 19 pia, por ateriza riba un pista di solamente 4.000 pia caba.  Pa lanta vuelo e mester di un pista di largura di 5.300 pia.  E por bula maximo 45.000 pia halto.

   E capacidad maximo cu por transporta carga den dje ta di 2.150 lbs.  Su capacidad maximo di jetfuel ta di 8.600 lbs.

   E avion priva aki a cuminza bula na Augustus 1980 y a cambia na varios ocasion di doño.  Despues di tabata pertenece na companianan Mericano, na 2014 el a pasa pa pertenece na compania Mexicano.  Na 2015 el a wordo cumpra bek pa un compania cu ta huur avion priva na Florida.  Pero desde Maart 2021 e avion aki ta pertenece na un consorcio di F.J.E. Figueroa LLC.

   Desvia di su ruta: Diaranson e avion a lanta vuelo for di Mexico y a bula cu un flightplan rumbo pa Aruba.  Sinembargo ora e tabata riba Lama Caribe y casi yega Aruba, diripiente su presencia riba radar a desaparece.

   Esey a socede ora cu esnan den cockpit a paga e transponder di ADS-B abordo, y esaki a pone cu e avion a bira ‘invisible’ pa varios radar regional.

   A sali na cla awor, cu e avion Sabreliner 65 aki mesora a baha di altitud, pa posiblemente evita di wordo detecta door di radar militar cu ta sigui vigila movimento, sea bo ta usando ADS-B of no den bo avion.

   E avion aki a tuma rumbo zuid, y lo a cruza Golfo di Venezuela, bay pa drenta Lago de Maracaibo, y a bay ateriza riba un pista clandestino cu posiblemente narcotraficantenan a traha den parti zuid di Lago de Maracaibo.

   Destrui cu un misil: Aparentemente radarnan Venezolano si a captura e movimento di e avion aki, aunke sporadicamente e ta desaparece ora cu e bula hopi abao.  Esaki a pone cu Forza Aereo Nacional Bolivariana (FANB) a lanza nan avionnan pa asina trata na intercepta esaki.  Pero prome cu esey a socede, ya caba e avion Sabreliner 65 aki a ateriza na e pista clandestino.

   Ora cu e avionnan Venezolano a pasa riba dje, nan a nota cu e Sabreliner 65 a ateriza, y a hasta taxi bek pa bay den centro di e pista, unda e tabata staciona.  Aki ta unda cu ordo a wordo pidi, y haya mesora pa destrui e avion aki cu un misil.

   Di e forma ey, Forzanan Arma Nacional Bolivariano (FANB) a destrui e avion pirata #31 cu a drenta espacio aereo di e pais na forma ilegal.

    Comandante Estrategico Operacional di FANB, esta Domingo Hernandez Larez a informa via Social Media, cu e avion aki cu matricula Mexicano, ta pertenece na e grupo cu nan ta yama ultimo tempo como ‘Terroristas Armados Narcotraficantes de Colombia’, y nan ta usa e apodo ‘Tancol’ awor.

   Bay busca mercancia: E hipotesis di autoridadnan na Venezuela ta cu e avion aki a sali di Mexico cu intencion di penetra espacio aereo venezolano clandestinamente djis pa ateriza, pa yena e avion cu carga cu kizas ta droga, y bandona e pais bek rumbo pa Mexico.

    Autoridadnan a bisa cu esaki ta e avion #31 pa e aña aki cu nan ta destrui, y a agrega cu e conteo total di tur tempo ta cu Venezuela a destrui 309 avion cu a viola su espacio aereo, pasobra e pais no ta permiti pa e wordo usa como plataforma pa narcotraficantenan.

   Venezuela no a duna ningun indicacion si durante e atake riba e Sabreliner 65, si acaso tabatin hende cu a perde nan bida.  Pero via social media, FANB mes a suministra tur e potretnan aki.