ATA ta cumpli cu donacion na Fundacion Ban Uni Man Pa Cria Nos Muchanan

Cu fondo genera di Autentico Aruba Culinary Festival 2024

ORANJESTAD (AAN): Aruba Tourism Authority (A.T.A.), den presencia di Ronella Croes CEO di A.T.A., Mr. John Fun Presidente di Fundacion Ban Uni Man Pa Cria Nos Muchanan, Gilbert Wernet Branding & Niche Manager di A.T.A., Tita Iglesias Events & Sponsorship Specialist di A.T.A., y Erika Hincapie Junior Branding & Niche Specialist. Di A.T.A., orguyosamente a cumpli cu donacion di AWG 10,000 na Fundacion Ban Uni Man Pa Cria Nos Muchanan. Un contribucion cu a wordo genera durante e prome edicion exitoso di evento culinario, esta Autentico Aruba Culinary Festival 2024.

  Cu mision pa celebra e rikesa culinario di Aruba, Autentico Aruba Culinary Festival no solamente a uni e comunidad a traves di cuminda, sino tambe a percura pa aporta bek na e comunidad. A.T.A., den nomber di e evento, ta sinti honra di por duna un sosten na Fundacion Ban Uni Man Pa Cria Nos Muchanan. Un causa importante cu ta yuda na provee cuminda na nos muchanan cu mas tin e necesidad. Cu e donacion aki, A.T.A. y Autentico Aruba Culinary Festival ta reforsa y aporta na sostenibilidad di e fundacion.

  Fundacion Ban Uni Man Pa Cria Nos Muchanan ta dedica na provee desayuno diario na scolnan, y cuminda di merdia na Trai Merdia. E fundacion actualmente ta sirbi un total di 839 mucha, y ta percura pa tur mucha por ricibi e alimentacion necesario pa nan crecemento y educacion.

   Banda di benta di banchi di e evento, y despues di a cubri gastonan administrativo, e donacion di AWG 10,000 ta un combinacion di credito cu a resta riba banchinan di transaccion di e bishitantenan di evento hunto cu un suma adicional agrega pa A.T.A. na e bon causa aki.

   Cu e suma di donacion menciona, e fundacion lo bay provee cuminda pa 20 mucha durante un aña completo. E donacion aki ta demostra e poder di iniciativa comunitario, y e impacto directo cu un evento relaciona cu turismo por tin na nos comunidad.

  Bisando esaki, y cu gran emocion, A.T.A. ta comunica cu pronto lo anuncia fecha pa e di dos edicion di evento Autentico Aruba Culinary Festival, caminda cu ta priminti di ta un otro celebracion extraordinario di cultura culinario di Aruba.