Janirey Severino, Relacionista Publico:
ORANJESTAD (AAN) Janirey Severino, Relacionista Publico y Marketing Manager di Universidad di Aruba, den entrevista cu Matutino DIARIO, a extende un invitacion na pueblo di Aruba, pa bishita UA, Diahuebs 3 di April venidero, pa 5’or di atardi, durante su open dag, cu lo ta interesante, agradable y interactivo.
Janirey a menciona cu esaki ta un evento diseña pa tur futuro studiante, pa bin busca informacion, haci pregunta y siña cual ta e opcionnan cu UA ta ofrece, pa yuda nan den nan proceso profesiona-academico.
E invitacion aki ta di caracter general, tanto pa alumnonan di derde klas, examen klas, personanan cu kizas kier haci un curso relaciona cu nan trabao profesional, of cu kier studia pa otro carera totalmente diferente, of haci un Master. Tambe ta invita mayornan pa bin join, haci pregunta tocante kico Universidad di Aruba, y Aruba mes, tin pa ofrece na futuro studiantenan.
Docente y studiantenan di UA ta bay ta cla pa contesta cualkier pregunta cu e bishitantenan tin, y tambe lo tin invitadonan special manera Instituto Pedagogico Arubano (IPA), Xavier University, Realign Consultancy, Education USA.
Janirey a bisa cu Universidad ta brinda oportunidad pa studia na Aruba mes, pero tambe den exterior sea na Europa of America, y nan por busca informacion tocante e oportunidad economico tambe, ki sosten Universidad por ofrece nan, economicamente.
E open dag, dia 3 di April otro siman Diahuebs ta cuminza atardi 5’or. Dilanti di Universidad e student clubnan lo yama bon bini e bishitantenan, y asina, si nan tin pregunta, of no sa na unda pa bay, e student clubnan por duna e guia, ya cu Universidad ta den construccion, nan a caba di habri Maria Convent y ta un tiki dificil pa haya e caminda lihe, pero p’esey tin e studiantenan dilanti di Universidad, pa yama bon bini, guia e bishitantenan, p’asina nan sinti nan mes bon bini for di comienzo, Janirey Severino, PR di Universidad di Aruba, a conclui.
