WILLEMSTAD: Wardacosta di Caribe Hulandes a ricibi Diadomingo merdia laat un alerta cu un buceado a ser perdi den area di Piscaderabaai na Curaçao.
Nan a haya sa cu e homber ta un buceador experto y e tabatin su mesun ekipo di scuba dive cune. Ta e scol di Scuba Diving cerca di Piscaderabaai unda e ta regularmente presente a bati alarma, ora cu e no a regresa na e horario palabra di antemano.
Despues di e melding aki, mesora Wardacosta a laga nan Helicopter lanta vuelo, como tambe a uza e avion Dash-8, y un boto patruyero di Metal Shark pa bay yuda busca e buceado.
Ora cu e informe a plama, tin mas buceado cu a drenta lama tambe pa yuda busca e homber den e area. Nan a keda busca te ora cu solo a baha, pero no por a localiza e persona. Asina mester a stop cu e accion di buskeda.
Dialuna mainta trempan, e accion di buskeda a sigui. E biaha aki si tabatin suerte, y a bin haya e curpa ya sin bida di e persona den area di Piscaderabaai. Unidadnan di Wardacosta hunto cu e Team di Buceado di Marina Hulandes, y demas buceado a bin haya e curpa di e homber di Belgica, kende ta bibando na Curaçao den e area.
E curpa sin bida a wordo transferi door di Wardacosta na Cuerpo Policial di Curaçao cu ta sigui atende e caso.
