ATA contribuyendo cu celebracion di Dia Nacional a lanza ‘Mi rason’

Ronella Croes, director a declara:

• Pa recorda tur hende nos proposito como Arubiano 

ORANJESTAD (AAN)-- Señora Ronella Croes, Director di Aruba Tourism Authority, a declara den entrevista cu DIARIO cu ATA a bin ta preparando pa contribui na e celebracionnan di e temporada aki, esta 50 aña di Himno y Bandera y 40 aña di Status Aparte y eigenlijk ATA ta e patrocinador principal di henter e calendario di eventonan aki.

   “E ta un honor di por contribui, mi por bisa na e calendario completo di diferente evento cu tin e luna aki. ATA, mi ta kere, ta e patrocinador principal di tur esakinan, colaborando cu gobierno di Aruba y otro instancianan, pero tambe diferente otro proyecto cu nos a traha riba dje”, CEO di ATA” Ronella Croes a declara.

   El a duna di conoce cu aworaki ATA lanza un proyecto yama “Mi rason”. “Pa recorda tur hende di nos proposito como Arubiano, con importante ta pa un nacion pa bo tin bo proposito presente, pa colectivamente tur hende sa di unda nos ta bin, unda nos ta awe, pero unda nos kier bay tambe y cargue cu orguyo. Nos ta refleha hopi awe y pa medio di e produccionnan cu nos ta lanza, mi ta yame produccion pasobra ta un pelicula corto pero tambe un cancion cu nos ta lanza cu su mesun video clip, p’asina, no solamente e pelicula pone e orguyonan biba, pero tambe pa medio di e cancion y e video clip por toca hopi hende tambe”, Ronella Croes, CEO di ATA a menciona.

   El a agrega cu e ta tambe pa reflexion. Cu reflexion por duna bo mas e sentido di optimismo, celebracion, pa cu e forza por sigui bay dilanti, considerando di unda nos ta bin.

   “Dus, e raiz cu ta forma nos direccion y ta duna nos e proposito ey. Esey ta loke nos a celebra, y lanza awe den colaboracion cu hopi artista local cu a participa den tur e proyectonan aki”, director di ATA, Ronella Croes a acentua.

   El a subraya cu e proyecto aki ta dirigi na nos comunidad local. Manera ta conoci, el a bisa, ATA ta haci hopi na nivel local y esaki ta un refleho di e etapa den cual turismo ta haya su mes den dje. “Nos ta sinti cu como ATA, sigur, ta hopi importante inverti den nos producto turistico, pero tambe den concientizacion, den optimismo, trece mensahenan di manera creativo asina aki, dilanti. P’asina nos por sigui conta cu e nacion cu ta kere cu si bo lora manga y traha pa bienestar di nos tur” CEO Di ATA a señala.