Parlamentario di AVP, Dennerich Kelly:
ORANJESTAD (AAN): Riba 13 di maart 2020, nos bida na Aruba a cambia di un momento pa otro. Loke a cuminsa como un crisis mundial di salud, pronto a bira un crisis nacional. Fronteranan a cera; economia a paralisa. Insiguridad a yega mas cerca di hopi hende cu nunca antes.
Pa un isla cu ta custuma cu actividad economico di turismo, e periodo ey a sinti irreal pero e tabata e realidad nobo. Sin embargo, e no tabata solamente un crisis di cifra y medida; e tabata un crisis humano, di famianan cu tabata preocupa, di empresarionan cu a mira nan futuro tambalia y e profesionalnan di cuido cu a para dia y anochi pa proteha e pueblo Arubano.
Seis aña despues, nos no ta wak bek solamente cu recuerdo, sino tambe cu comprension. Covid-19 a mustra nos con salud ta conecta cu tur loke ta forma nos bida diario; cu enseñansa, cu economia, cu stabilidad social. Covid-19 a siña nos cu salud publico no ta un sector separa, sino e ta un fundeshi di resistencia nacional.
Den momentonan dificil, Aruba a mustra algo mas: e forsa di fe y solidaridad. Apesar cu mester a distancia, hendenan toch a haya otro bek — den cuido pa bisiña, den oracion, den gesto chikito di apoyo. Profesionalnan den cuido, servicionan di emergencia y hopi otro sector a para riba prome liña y tabata e heroenan sin capa den e epoca aki. Nan ta recorda nos cu liderazgo no semper ta fuerte den palabra; hopi biaha e ta mustra den dedicacion y responsabilidad.
Kisas e les mas grandi di e epoca ey ta cu un pais chikito mester por pensa grandi. No solamente ora un crisis presenta, sino mescos ora e temponan ta calmo. Inverti den prevencion, tanto den salud fisico como den salud mental y den un sistema di cuido bon organisa y no di luho. E ta un condicion pa nos sociedad por keda resiliente.
Awor, seis aña despues, Aruba ta draai atrobe. Nos economia a recupera. Nos comunidad ta wak pa dilanti. Pero mira padilanti nifica tambe, keda consciente di loke nos a siña. E siguiente generacion ta spera di nos cu nos ta traha pa un sociedad cu ta prepara — no solamente pa desafionan inespera, sino tambe pa oportunidadnan di futuro.
Pesey, recorda 13 di maart no ta un momento di para keto, sino un invitacion. Un invitacion pa sigui inverti den loke ta haci nos como pais fuerte: solidaridad, responsabilidad y cuido pa otro. Pasobra, finalmente, un futuro fuerte ta cuminsa cu un base fuerte; y e base ey ta den salud.
