Aspirantnan pa bira agente di Wardacosta ta inicia trayecto nobo den nan estudio

ORANJESTAD (AAN):  Diabierna ultimo, aspirantnan di e estudio basico pa bira agente di Wardacosta (Basis Opleiding Custwacht (BOK) 2023),

a marcha drenta Marinebasis Parera despues di cuater siman di entrenamento intensivo.

                E 21 aspirantnan di Aruba, Curaçao y Sint Maarten, tin un meta, un carera bunita na Wardacosta.

                Durante e simannan di introduccion e hobennan pa cuater siman largo, bou di guia di nan instructornan a sigui les den klas y bay diferente campamento introductorio.

                Durante e campamentonan, e aspirantnan a marcha basta kilometer, landa hopi, cushina nan mes, construi vlot y tambe a completa ehercicionan anfibio.

                Nan ehercicio final pa nan simannan di introduccion di ‘Samen Sterk’ a cuminza diahuebs ultimo parti anochi. Pa e ehercicio final aki e aspirantnan a marcha y a rema riba laman cu destino final Marinebasis Parera riba diabierna mainta.

                Na Marinebasis Parera e aspirantnan a keda ricibi cu un aplauso caluroso na entrada di parti di coleganan di Wardacosta y otro coleganan.

                Durante e ceremonia Director di Wardacosta Caribe Hulandes, Walter Hansen a hiba un discurso pa e aspirantnan y nan instructornan. “Bosonan a cuminza e trayecto aki, 14 di augustus como 21  persona individual di cual 10 candidato di Aruba, 6 di Curaçao y 5 di Sint Maarten.

                Awor, 4 siman despues, mi ta mira 1 grupo, 1 unidad! Wardacosta ta un profesion bunita, importante y honorabel. Bo ta bisti dos pechi: un di polis y un di marinero. Awor e otro parti di bosonan estudio ta cuminza. Esaki ta solamente e fin di e prome fase. Tur cos cu bo siña awor, bo por uz'e den bo trabao den futuro. Awor bo tin e chance pa haci fayonan y siña for di nan. Exito ta unicamente posibel si bo traha como tim. Hunto nos ta fuerte! Pabien!”

                Despues di e discurso di e Director, e aspirantnan a ricibi nan pechi oficial di BOK, como muestra di aprecio pa nan prestacionnan durante e simannan di introduccion.

                E siman aki e aspirantnan ta bay cuminza cu e modulo basico di habilidad, cu ta inclui prome auxilio (EHBO) y habilidadnan di tiro, cu lo bay dura 8 siman. Wardacosta ta desea e aspirantnan hopi exito.