RAft rechasa den Parlamento mester expone funcion di Parlamento
*Pueblo ta paga Parlamento pa preveni accion di Reino segun Statuut
*For di 2014 Reino mester a exigi mayoria Parlamento ehecuta Ley
ORANJESTAD (AAN) — Progreso cientifico, cambio di clima y su exigencianan, gueranan den e lucha pa poder mundial, na 2023 a uni na un mundo cu mester a confronta e caida di forsa financiero inespera pa motibo di Covid-19.
Sucesonan mundial a haci cu e sistema gubernamental di Aruba tambe mester bolbe na su base.
E sistema politico, ta bira e fuente pa produci dirigentenan cu ta ehecuta e necesidadnan di un Pueblo.
Pueblo ta eligi su representantenan cu ta forma Parlamento, cu no ta un club social cu happy hour acompaña cu show pa deleita Pueblo, pero e centro di gobernacion di Pueblo.
Den mundo empresarial, ta topa cu accionistanan, cu ta nombra gerentenan pa dirigi nan compania. E accionistanan den mundo politico ta Parlamento, cu ta wordo paga, pa na nomber di Pueblo y a base di ley, controla y percura pa e gerentenan den e Conseho di Ministro, haci nan trabou a base di e programa di gobernacion.
Bon gobernacion tin su raiz directo den loke wordo priminti den cuadro di loke ta posibel, na Pueblo durante campaña electoral.
Esaki ta e punto di origen di tanto problema cu Aruba tin awe.
Na 2009 Aruba a conoce un politico peligroso na un momento peligroso. E recesion mundial di 2007 a hinca Aruba tambe den problema cu mester a wordo soluciona cu creacion di mas entrada pa e pais.
Aruba a wordo ciega dor di Mike Eman cu a entrega Aruba un plan di gobernacion, cu a kibra ley.
Rapportnan oficial ta indica cu Mike Eman a ciega Pueblo cu e bolo di mitar BBO, cu gremionan no a analisa bon, mescos cu e aumento di gastonan pa Pueblo paga den futuro y proyectonan cu tambe mester paga den futuro.
Parlamento di Aruba na 2009 mester a rechaza e plannan di Mike Eman como Ministro Presidente, pero e mayoria di Parlamento a wordo eligi como parti di e grupo di Mike Eman.
Parlamento di Aruba a pone rapportnan importante un banda y a viola e Ley di Contabilidad cu ta dicidi con ta gasta placa di Aruba.
Mayoria di Parlamento di Aruba a zink porvenir di Aruba na 2010 y a continua a lo largo di su permanencia te 2017.
Pasobro e Parlamento di Aruba entre 2009 pa 2017 no a haci su trabou, pero a deshaci di su responsabilidad pa sostene Mike Eman cu nan a pone riba ley, Aruba a wordo pusha den zona di desastre pa cual awe Aruba ta paga.
Si Aruba tabata tin e reserva cu Ley ta exigi pa un pais tin pa por confronta problemanan, ora pandemia a bati na porta, Aruba lo tabata den un posicion diferente cu un saldo favorabel riba su presupuesto.
Aruba lo a busca prestamo, mescos cu tur pais na mundo mester a haci pa confronta Covid-19, pero Aruba lo no mester a bay pidi 500 Miyon na un Hulanda, cu a splica cu Aruba tabata den estado di bancarota prome cu pandemia a presenta.
Fayo di e constelacion mayoritario cu a cuminsa cu 12-9 na fabor di AVP na 2009, pa haci su trabou como contralador financiero di Gobierno, ta origen di e origen di e negociacionnan cu Prome Ministro Evelyn Wever-Croes a hiba cu Hulanda.
Eleccion 2017 a cambia rumbo di Aruba, cu ya tabata bou supervision Hulandes, cu Gobierno Evelyn Wever-Croes a hereda.
Ta e cambio di maneho financiero di Wever-Croes, cu a bandona fantasia y subi caminda di realidad, a haci cu awe Hulanda a bay di acuerdo pa no impone sin mas e supervision cu Hulanda kier, pero pa yega na un supervision cu ta parcialmente di Reino y parcialmente di Aruba.
E contenido cu e Ley cu mester acomoda Aruba y Hulanda lo haya, ta wordo negocia mientras na momento di crisis mundial na final di 2023, Aruba por sigui traha riba un futuro economico, financiero cu ta base di autonomia!
Fayo den e funcionamento di Parlamento a conduci na e menasa di Secretario di Estado Raymond Knops pa un supervision cu por mishi cu e trabou di Parlamento tambe.
Mientras Prome Ministro Evelyn Wever-Croes a logra cu negociacionnan cu Hulanda riba RAft enfrente e debe di Covid-19 tambe, tin un exigencia pa Parlamento.
Parlamento awor tin e deber, di entrega prueba cu e no ta un club social ni un teatro pa partidonan haya voto, pero e representacion sagrado di Pueblo di Aruba, cu a faya cu Pueblo entre 2009 pa 2017 ora no tabata bienestar di Pueblo pero e desgracia di Aruba orkestra pa Mike Eman, cu Parlamento a sirbi!
