Asina a kima Rey Momo pa core cu tur mal rosea riba dje

Final di Carnaval 71

ORANJESTAD (AAN): Diadomingo anochi mes, despues cu e Parada Grandi di Carnaval 71 a yega na final, tur hende a cana e pida caminda extra pa asina a yega na Harbour Arena.

   Esaki ta e lugar unda e gruponan di Carnaval a escoge hunto cu SMAC pa un biaha mas e anochi ey mes kima Rey Momo.  Di e forma aki a core cu tur e mal rosea cu tabatin riba dje.

   Aunke e aña aki no tabatin clapchi suficiente, toch por a mira cu Rey Momo a kima basta rapido ora cu e monarcanan di Carnaval a cende su pia na candela.  Esaki a socede un poco despues di 9’or di anochi.

   Asina a marca final di e temporada di Carnaval 71 pa aña 2025.  Pasobra ya pa hopi aña caba no ta organiza e ultimo parada di Carnaval riba Diamars anochi mas.

   Carnaval otro aña: Tuma nota cu Carnaval 72 di otro aña lo bay ta aun mas trempan.  Parada Grandi lo bay ta riba Diadomingo 15 di Februari 2026.

   Si acaso bo kier sa e fecha di aki dos aña, esta 2027, esey ta aun mas trempan.  Esey lo ta Diadomingo 7 di Februari 2027.