Asina a honra e gran cantante Chicho Kock durante Festival di Tumba

ORANJESTAD (AAN): Diasabra anochi den Balashi Beer Garden, na ocasion di e di 53 evento di Festival di Tumba,

e organizadornan SMAC a dicidi na rindi homenahe na un di e gran tumbero di e isla aki, esta e conocido Chicho Kock.

   President di SMAC, Darren van Ommeren a subi escenario pa asina duna elogio na e caminda di oro cu e cantante Chicho, di cual su nomber real ta Roland Narcisio Kock, y su nificacion pa historia di Tumba na Aruba.  Chicho a bay cuatro biaha cu e corona di Rey di Tumba.

   Chicho cu amor grandi pa musica, a pone drenta Tumba Contest desde 1976 caba, y na 1986 a dal un hit cu a keda resona tur caminda, esta ‘Burachi ‘n ta Conta’, y esey a dune e prome corona di Rey di Tumba.

   Otro exitonan grandi di Chicho den historia di Tumba pa e.o. ‘Pal’i Coco’, ‘100 Porciento’, y ‘Gago’.

   El a ricibi un plaquette special riba Diasabra anochi den Balashi Beer Garden, y cu sonrisa riba su cara por mira cu Chicho tabata orguyoso cu e Festival di Tumba a wordo dedica na dj’e.