Jhon Freddy Tobón Montoya ta splica:
"E rikesa di nos pais ta nos multiculturalidad"
ORANJESTAD (AAN): Den luna di mei lo tuma luga celebracion di e prome lustro di Dia Mundial di Diversidad Cultural pa Dialogo y Desaroyo. Esaki lo ta riba dia 21 di mei 2025.
DIARIO tabatin oportunidad di combersa cu Jhon Freddy Tobón Montoya, kende a duna mas detaye riba e celebracion aki.
Tobon Montoya ta lider di proyecto di Departamento di Cultura (DCA) tambe e ta traha cu algun organisacion no-gubernamental (NGO's) como trahado comunitario dunando asistencia na comunidad.
El a bisa cu ta den pleno preparacion pa loke ta trata e prome lustro di celebracion di Dia Mundial di Diversidad Cultural pa Dialogo y Desaroyo y tambe 20 aña di Encuentro Multicultural cu den temponan pasa a yam'e 'Feria Multicultural'.
El a laga sa cu e titulo mes aki di feria no tin un contenido cu por saca probecho di dje. P'esey a transform'e den un 'Encuentro Multicultural' na unda tur persona di diferente rasa y nacionalidad ta bini hunto pa comparti nan arte, nan talento, nan cultura, nan idioma y ta comparti cu otro, siña conoce di otro y tene na cuenta e frase di e prome director di DCA, Hubert 'Lio' Booi: "Pone e Arubiano na altura di su cultura y siña conoce di otro".
E aña aki ta celebra e prome lustro y a dun'e mas contenido. 21 di mei ta e fecha special aki na unda tur e colonianan aki residencia na Aruba of gruponan estableci na Aruba di cualkier pais tin e oportunidad di brinda na comunidad tur nan experiencia den cualkier forma di expresion manera poesia, musica, arte, gastronomia, teatro, literatura, entre otro. Asin'ki ta traha pa e paz y unidad di tur e pueblonan di mundo, Tobón Montoya a duna di conoce. "E rikesa di nos pais ta nos multiculturalidad", el a agrega.
El a agrega cu esaki ta un evento nacional caminda diadomingo prome cu dia 21 ta haci e celebracion y ta mustra e diferente expresionnan artistico di cada pais cu ta inscribi y dia 21 di mei mes ta realisa un marcha pa paz.
E meta di tur esaki ta pa integra y e bunita di esaki ta cu dia 21 di mei ta dia di oficialisacion di Papiamento. Esaki ta nifica cu ta bay tin dos celebracion riba e mesun dia. Con por integra esaki? Dunando e oportunidad pa cada pais presenta na nan propio idioma, pero tambe haci un introduccion na Papiamento pa asina mustra cu tin e capacidad di integra y ta agradecido, esey ta loke Jhon Freddy Tobón Montoya a duna di conoce den cuadro di e eventonan aki cu lo tuma luga na San Nicolas, cu e deseo di por trece e actividad bek na Oranjestad.
Keda pendiente pasobra mas detaya riba e programa di actividad lo wordo anuncia den e proximo lunanan.
