Asina a despedi di Chicho Kock como coredor di Dragracing na Palo Marga

ORANJESTAD (AAN): E ultimo recorido di e tan stima Chicho Kock riba e pista International Raceway Park, Palo Marga.

Sigur e horario a hunga un papel importante den e caso aki, cu no mucho coredor of vehiculo di Drag , por tabata presente pa asina honra Chicho den su ultimo recorido riba Palo Marga.

   Loke a hala hopi atencion tabata, cu 1 di e directiva di ABM tabata presente. Tempo cu Joy Werleman tabata forma parti di e directiva aki y esun anterior, tog bo tabata haya Joy ta haci acto di presencia y tabata percura pa sikiera un krans pa e defunto. E biaha aki nada nada.  Un tiki berguensa, pa mira ki valor e coredornan y nan famia tin pa ABM.

   Pa colmo, ni sikiera a pidi DOW drecha e caminda, pa asina evita di core ariba un caminda den un asina mal estado, anto esey ta sin papia mes di e mal estado cu e tereno di Palo Marga ta aden actualmente.  A compronde recien cu tin problema cu stock di asfalt na Aruba, unda DOW no por drecha hopi ruta unda cortehonan funebre ta pasando.

   Pero encuanto e pista di Palo Marga, ora cu DIARIO a puntra pa e machine nan nobo cu Gobierno a caba di hinca placa grandi aden, a bin compronde, cu nan “ta cera den un container”, cu ni sikiera tin ventilacion, pues aki un par di dia, ora cu mester bolbe uza e machine nan aki, ta machinenan den mal estado, lo haya.

   Den pasado diferente grupo tabatin e trabao pa maneha e pista di Palo Marga, algun a haci bon trabao y otronan no mucho bon, pero esun cu tin actualmente, a gana e corona den mal maneho.