Asesinatonan a causa un impacto grandi den sentido di seguridad den comunidad

Procurador-General, señor Bote Ter Stege

ORANJESTAD (AAN): Diadomingo atardi, den un conferencia di prensa, Procurador-General, señor Bote Ter Stege, Alto Comisario di Aruba señor Ramon Arnhem, y Lito Lacle, vocero di Cuerpo Policial tabata presente pa asina duna mas informacion relaciona cu caso tragico di asesinato.

Procurador-General a indica cu den un termino cortico di tempo, dos incidente serio a tuma lugar, na unda e victimanan a fayece. E victimanan hoben ta causa un impacto hopi mas grandi den sentido di siguridad den comunidad.

El a agrega cu den e casonan aki, tin diferente testigo cu tin imagennan horibel di locual a sosode, y esaki riba su mes ta un trauma.

Procurador-General, señor Bote Ter Stege a manda palabranan di condolencia di parti di Ministerio Publico y Polis na tur famia y amigonan di victimanan. E ta conciente cu esaki no ta trece nan bek, pero el a enfatiza cu nan ta bibando e dolor cu nan y lo haci tur cos posibel pa trece e culpabelnan dilanti di hues.

Señor Bote Ter Stege a papia un tiki di e dos caso tragico, na unda dia 30 di November, un hoben di apenas 19 aña a wordo asesina cerca di Tanki di Savaneta y tin diferente detencion relaciona cu e caso aki.

Den caso di dia 3  di December, den oranan di marduga un pelea a termina cu tiramento na altura di ex-Sand Bar situa na Palm Beach, Noord. E victima tin 31 aña di edad. Un unidad di RRT a detene un persona na un apartamento situa na Saliña y a confisca un Toyota modelo Vitz pendiente di mas investigacion.

El a agrega cu biaha tin relacion entre sospechoso y victima, y nan ta investigando si esaki tambe ta asina den e caso aki. Ter Stege a indica cu den ambos incidente dentro di 1 ora caba a detene sospechosonan. E mensahe ta cu bo no ta scapa so bo comete un acto asina

Hopi sa puntra kico Ministerio Publico y Polis ta haci pa preveni e tipo di casonan aki, y el a bisa cu polis tin un strategia pa bin cu mas vigilancia di camara den diferente area, specialmente den area di bida nocturno na Noord, pero lo evalua na unda mas pa instala mas camara.

Alto Comisario di Aruba señor Ramon Arnhem a urgi comunidad pa keda atento y yuda polis  evita casonan aki. Duna tip y informacionnan. E persona lo keda anonimo.