Na vispera di 2023 mas problema ta presenta na mundo confuso
*Gastonan pa produci cuminda ta afecta cria na paisnan grandi
*Produccion di awa pa bebe y manteca pa pan a bira peligroso
ORANJESTAD(AAN)—Durante basta tempo hende ta papia di cambio den clima cu lo bira causante di desaster pa hende na mundo.
Conferencianan mundial a papia y sigui papia di cambio di clima y medidanan cu mester tuma. Cu e planificacion directo a laga hopi di desea na nivel internacional, ta bini dilanti awor cu paisnan ta prepara pa tuma medidanan cu lo tin impacto enorme riba hende.
Na 2022 mas y mas hende por a tuma nota di e efecto di cambio di clima riba planeta tera y tambe entre otro riba e resultadonan pa produccion den agricultura cu a wordo afecta pa secura of di otro banda dor di yobidanan pisa cu mal tempo a provoca.
Introduccion di medidanan na nivel mundial na e momentonan aki ta parti di maneho na diferente pais pero tambe di preocupacion grandi pa e implicacion cu nan ta encera.
Den futuro tin manteca pa pone riba pan? Cuanto awa pa bebe por produci?
Gobiernonan rond mundo y asina tambe na paisnan cu ta produci cuminda, a cuminsa ta tuma medida pa confronta e cambio di clima cu ta bira controversial.
Problemanan serio ta sigui haya atencion y mester di solucion pasobra ta loke hende mester pa keda na bida, ta hustamente crea peliger grandi pa e ambiente den cual hende mester biba.
Pa ilustra e situacionnan serio cu ta presenta na mundo, sigur mester tuma nota di loke a pasa na New Zealand, un pais cu ta sumamente importante pa e cushina na Aruba tambe.
Riba paki di manteca ta topa den hopi caso cu e nomber New Zealand cu un economia cu pa casi cincuenta porciento ta depende riba agricultura.
Cientificonan a descubri cu uno di e fuentenan di peliger grandi pa cambio di clima, ta produccion di cuminda.
Un baca ta un peliger pa comunidad pasobra sushi di baca ta wordo considera como uno di e enemigonan grandi di clima.
Introduccion di belasting special riba sushi di baca, ta aumenta prijs di cuminda pero tambe ta afecta e interes pa traha den cria. Cantidad di productor di productonan cu ta necesario pa pone cuminda riba mesa, ta bira lomba pa nan negoshi y hobennan tambe ta nenga di sigui cu e tradicion di cria cu nan a hereda.
Pa atende cu e peliger di sushi di baca y otro ganado, mester tuma medida. Esaki ta nifica cu no ta solamente pesca a resulta peligroso pa clima pero tambe produccion di carni ta motibo di e sushi cu bacanan ta laga atras y cu ta produci gasnan cu ta afecta clima.
Por bisa cu hende mester come solamente berdura, pero aki tambe ta topa cu metodonan cu ta wordo uza y cu ta afecta clima.
Solucionnan importante ta wordo busca no solamente pa produccion di loke ta come pero tambe pa produccion di awa pa bebe y awa cu ta necesario como producto basico pa hopi articulo alimenticio.
Transforma awa di lama den awa pa bebe, ta exigi un proceso den cual mester di energia na un mundo cu lo deshaci di petroleo.
Actualmente uzo di energia nuclear pa produci energia ta uno di e solucionnan. Uzo di e olanan di laman ta otro posibilidad cu ta gosa di mas aceptacion.
Na 2023 mundo lo mester stop di papia y cuminsa tuma decisionnan importante, manera informantenan a indica.
Pa atende cu cambio di clima, bida mester cambia na un forma mas serio cu hende lo a spera.
Gobiernonan rond mundo mientrastanto ta trata na tene agricultornan y personanan cu pa generacion a biba di loke campo, laman y cria ta produci y awor no ta mira con nan por sigui haya entrada pa nan mes y na famia.
E realidad mundial nobo ta bay contra e necesidad pa produci alimento y pa fomenta interes den produccion di cuminda rond mundo, cu hamber creciente na cantidad di pais.
Na caminda pa 2023, DIARIO ta sigui produndisa den e materia aki, cu lo bay mishi tambe cu economia mundial ya cu produccion y comercio den cuminda, ta ocupa uno di e puestonan mas halto riba lista di necesidadnan na tur pais.
Kico lo pasa cu prijsnan ora e demanda pa cuminda sigui subi y e produccion wordo afecta dor di medidanan cu ta tuma cu placa cu gobiernonan rond mundo ta pone disponibel na nan pais pa enfrenta clima?
DIARIO lo sigui informa!
