A kita corona di Miss Bolivia 2022 pasobra a haci bofon di Miss Aruba y varios otro candidata pa Miss Universe 2022

El a haci bofon di Miss Curaçao tambe

LA PAZ: Hopi spotlight ta wordo dirigi riba candidatanan di beyeza ora cu mas y mas e certamen ta yegando cerca, incluyendo pa Miss Universe.

   Pero loke recien Fernanda Pavisic a haci parce cu el a bay te di mas, como cu el a haci bofon directamente di su competidornan di e evento menciona.

   Haciendo bofon mahos: Fernanda Pavisic ta Miss Bolivia Universe, y el a post un video recien den su history di Instagram, unda el a papia nada bunita di e otro participantenan pa e certamen aki.  E modelo specificamente a papia contra e candidatanan di Miss Universe Paraguay (Leah Ashmore), Brasil, y El Salvador cu el a tilda cu nan ta “doña”.

   E representante di Bolivia a haci bofon tambe di Miss Universe Ecuador (Nayelhi Gonzalez), Miss Universe Aruba (Kiara Arends), y Miss Universe Curaçao (Gabriela dos Santos) sigurando cu e tres candidatanan ey ta den categoria di “danki pa participa”.  Pa colmo, e Miss Universe Argentina, esta Bárbara Cabrera el a yama ‘Miss Potosi’ pa purba ridiculiza e candidata.

   E video cu a circula tambe riba TikTok a inclui bofon haci riba Miss Universe Peru (Alessia Rovegno) y Miss Universe Venezuela (Diana Silva), bisando cu e dosnan ey ta parce hende transsexual.

   Publico a bira furioso: Na momento cu e videonan aki a cuminza circula, hendenan riba Internet a bira furioso di Miss Universe Bolivia.  El a bira blanco di criticanan riba su comentarionan aki unda el a husga apariencia di demas reinanan di beyeza.  Otronan a bisa cu nan ta spera cu e organizacion di Miss Universe Organization lo tuma bon nota di esaki y bin cu medida.

   Nan ta considera loke Miss Universe Bolivia a haci como un sorto di bullying.

   Defensa fofo di candidata:  Despues cu el a ripara cu mundo ta birando contra di dje, mesora Miss Bolivia Fernanda Pasivic a trata na defende su mes, y a inventa un storia cu “tur su comentarionan tabata parti di un experimento social”, y cu hamas el a pensa cu tur esaki lo bay sali for di man.

   El a spanta, y awor ta bisa cu e mes ta poniendo na riesgo tur loke el a traha tur su bida pe.  Su mision ta pa laga un rastro atras, y genera consenshi.  El a bisa cu Social Media a bira un herment fundamental, pero ta ki contenido publico ta consumi?  El a bisa cu si su proyecto tabatin e alcance cu e video aki a haya, e lo por a yuda hopi famia mas di su pais, segun su declaracion.

   Con e lo yuda famianan di su pais?  Haciendo bofon tambe di nan?

   Medida tuma mesora: Loke Fernanda no a spera, ta cu e video ey tabatin un impacto social y politico hopi fuerte na su pais Bolivia.  Ciudadanonan a haya berguenza cu nan representante di beyeza ta pone un video “discriminatorio” y “racista” asina.

   El a bira mas serio, ora cu Alcalde di ciudad di Potosi (Bolivia) a presenta un keho penal contra e candidata, y mesora e organizacion di Miss Bolivia, esta ‘Promociones Gloria’ a haya asina hopi mal comentario, cu mesora a tuma decision pa destitui Fernanda Pavisic di e titulo, y su corona a wordo kita di dje.

   Esey nifica cu e candidata aki procedente di pueblo di Cochabamba no por participa como representante di Bolivia na e certamen di Miss Universe 2023 cu ta poni pa tuma lugar dia 14 di Januari 2023 na New Orleans, na Merca.

   E organizacion a kita corona di Fernanda pasobra el a haci declaracionnan ‘inapropia riba su coleganan’ y “comentarionan den tono di bofon’, y cu e no a cumpli cu e reglanan riba comportamento pa reinanan di beyeza.

   Gobierno nada contento: Vocero di Gobierno di Potosi, esta Aldo Effen tambe a elabora riba e asunto aki, ora cu su video a plama rond mundo.  “Nos no por acepta cu ta bay discrimina e muhernan di Potosi y di nos pais. Nos ta condena tur e accionnan aki, y nos mes ta bay tuma accion huridico relaciona cu e declaracionnan discriminatorio aki,” el a bisa.

   E grupo Comite Civico Potosinista tambe a core pidi pa kita e corona di Fernanda Pavisic, pasobra “e no ta representa e balornan y sentimento di pueblo potosino y boliviano, ademas e ta haci Bolivia keda ridiculo pa su comentarionan dirigi na futuro representate di Miss Universe.”

   Pa colmo, Fernanda Pavisic ainda no a compronde kico el a haci malo, y a bin declara awor cu su destitucion ta ‘inhusto’ y ta insisti cu nunca el a haci comentario ni declaracion racista of discriminatorio contra otro.  Atrobe e ta bolbe defende su mes cu ta un ‘experimento social’ el a haci.

   Pero el a admiti si cu awor e mes y su famia ta hayendo monton di insulto grave.  Kizas e mester a pensa bon prome cu el a graba e video.

   Den apenas algun ora despues, nan a corona Maria Camila Sanabria Pereyra (kende a participa pa Miss Grand Internacional 2022) como e Miss Universe Bolivia nobo.