ARUBIANO Awareness Bags pronto cu coleccion nobo lo ta unico y hopi bunita

• 
• 
• 
•  

ORANJESTAD (AAN): Ora bo cuminsa concientizacion for di hoben caba pa haci tur cos bira mas sostenibel pa bo isla... e lo por trece cambio di cultura y comportamento tambe!

   Esey ta e meta pa purba concientiza hobennan pa nan stop di uza saconan di plastico, y bay enfoca riba saconan renobabel.

   Esey ta loke e ARUBIANO Awareness Bags ta contribuyendo na dje.  Y pronto nan lo bay ta lanzando coleccion nobo. Tur e diseñonan ta autentico, cu potretnan di Aruba su naturalesa, flora y fauna, crea cu dedicacion pa yuda cu concientizacion den comunidad.

   ARUBIANO Awareness bags su vision ta pa yuda promove y preserva especialmente nos parhanan endemico of den peliger di extincion, manera e Shoco, Patrishi y Prikichi.

   Di e forma aki, ARUBIANO pa mas di 6 aña caba ta sigui crea conciencia na tur famia, hoben, amigo, bisiña, coleganan y mucha chikito, pa entre nos tur sigui educa y contribui na cuido di nos medio ambiente.

   Apesar di ta un pais chikito, Aruba tampoco ta keda indiferente dilanti e problema di contaminación, y Aruba a stop e uso di saco di plastic.

   Pabien Aruba cu nos tambe ta contribuyendo y por sinti orguyoso di yuda preserva nos Medio Ambiente.

   Food Security: Ademas di esey, ARUBIANO Awareness bags hunto cu sector

primario y Santa Rosa, a introduci saco nan biodegradable pa producto di agricultura local tambe.

   Nan a mira e necesidad pa aporta cu saco nan reusable y eco friendly cu por contribui na nos Seguridad di cuminda, stimulando asina tambe nos futuro generacion encuanto di e importancia di planta, door di pone mensahe tambe riba e saconan cu ta special pa simia, tera di fertilizacion y gordura.

   Pronto e saconan di ARUBIANO lo ta na bo lugar di semper, e.o. Super Food.

   Texto: Eva Wever, y fotografia: Damilice Photography.

• 
• 
• 
•