Mundo en espera di 5 di November 2024 y e resultado pa su futuro
*Campaña electoral na Merca ta cera sin contesta pa pregunta serio
*Kico por spera di defensa di Merca den conflictonan mundial actual
ORANJESTAD(AAN)—Kico ta spera mundo despues di Januari 2025, ora un Presidente nobo di Merca, huramenta?
Esaki ta e pregunta central durante e ultimo weekend prome cu e momento cu Pueblo di Merca ta acudi na urna electoral pa dicidi kende lo bira e Preidente di e pais.
Cu mundo ta confronta un ciere dificil di e prome 25 aña di Siglo 21, no ta laga espacio na ningun duda.
“Duda”ta hustamente e palabra cu mas ta resona, si tene na consideracion tur loke a bini dilanti durante e campañanan presidencial di e pais, cu ta uno di e podernan mundial.
No por deshaci di e realidad, cu situacionnan di tension mundial ta presenta preguntanan serio pa Merca pa loke ta trata conflictonan mundial cu por rementa.
Kico ta e plannan concreto pa e Defensa Mericano, cu ta tambe defensa di mundo liber pa un gran parti di mundo, aunke e forza di Merca awe ta wordo cuestiona?
Con Presidente di Merca cu tin paz mundial of guera mundial den su man, ta pensa di Oekraine, di Medio Oriente y Region di Caribe caminda suspenso tin motibo pa Reina?
Kico por spera di un plan di defensa di un mundo agota di problema, cu mester di figuranan fuerte pa e por conoce cambio?
Durante e ultimo lunanan, mundo ansiosamente a keda en espera di loke ta e plannan den tanto cambio cu lo presenta nan mes durante e proximo cuatro añanan.
Con ta bay confronta e clima cu sin piedad ta sigui ataca y ta causa tanto tragedia na tur parti di mundo?
Kico lo pasa cu un economia mundial, cu un prijs di petroleo cu atrobe a baha te bou di 70 Dollar pa baril na entrada di prome fin di siman di November?
Pregunta y mas pregunta ta manifesta nan mes den un situacion mundial serio, cu ta bira mas explosivo cada rato.
Manera na varios ocasion DIARIO a trece dilanti, no ta importante si e ganador ta homber of muher. E raza, e genero, e decendendia nada ta mas importante, cu e maneho cu e tin planea pa e planeta Tera.
Siglo 21 a habri cu e eleccion den cual e yiu mayor di e prome Presidente Bush, a gana di eleccion presidencial di Merca y e Vice Presidente Democratico, Al Gore, a bira perdedor.
Den e situacion aki tambe a wordo papia di un situacion preta manera ta e caso actualmente, pero e hecho cu un situacion electoral ta preta no ta duna ningun importancia na e momento decisivo di un Pueblo cu lo conduci na un maneho cu ta afecta henter mundo.
Ora mira atras riba e proceso electoral di 2024, e pregunta serio cu mester wordo laza ta, si ta trata aki di eleccion pa un persona cu ta bay tin resultado directo pa henter mundo.
Mester admiti cu durante e ultimo periodo di gobernacion di Presidente Joe Biden, e forza di supremacia Mericano a bay atras y mas bien duda serio mester wordo lanza riba loke por spera pa futuro di Merca.
Hustamente pa e motibo aki, na e momentonan aki mundo mester tin seguranza cu e dirigente mundial cu eleccion presidencial na Merca produci, por ta un figura cu ta refleha e posibilidad pa soluciona pa problemanan mundial serio.
Ora analisa e situacion mundial cu parametronan autentico pa liderazgo, por nota con lamentablemente, paisnan cu tabata fuerte y por a wordo considera asina baluartenan di mundo liber, conoce gobiernonan cu no ta crea e impresion cu nan ta suficiente fuerte, pa impone loke mundo mester pa mundo por resolve su problema.
Na prome lugar mundo mester conoce paz, cu no ta wordo alcansa cu actitudnan cu carece di forza na un mundo di hende, cu semper ta exigi liderazgo.
Kico ta liderazgo? Un dirigente cu ta delinea un caminda cu mester sigui y asina ta inspira pueblo pa sigui rutanan cu por ta dificil.
Kico futuro di Merca lo ofrece na mundo? Francamente nos no por bisa si contestanan clave pa situacionnan mundial, no a wordo presenta.
E prome weekend di November 2024, sin duda ta invita poblacion mundial pa descansa un rato prome cu e dianan di Diamars ora lo bira conoci kico e resultado di eleccion presidencial na Merca lo ta.
Kico lo sigui, francamente nos no sa, mientras di otro banda si nos ta sigui tuma nota di Gobiernonan peligroso pa e situacion di un mundo, cu tin problema pa hala rosea pasobra calor ta mata hende cu di otro banda ta muri tambe yobida pisa, bira destructivo.
Na entrada di November 2024 mas cu nunca Aruba mester ta contento cu su recuperacion pero na mes momento atento pa loke cera e prome cuarto di Siglo 21 na 2025!
