Ni atake gueriyero den centro di Playa por a derota DIARIO y Aruba
*Prome Hefe di Redaccion ta recorda aniversario di DIARIO awe
ORANJESTAD(AAN)—Ora papia di Jossy Mansur ta papia di un visionario real, cu no a dicidi sin mas cu e ta introduci un matutino pa Aruba, pero a tene na consideracion tur aspecto, incluso e aspectonan legal, pa e introduci DIARIO.
Te na momento cu DIARIO a wordo introduci, corantnan Antiano tabata mantene paginanan noticiero pa Aruba pero e Hefe di Redaccion tabata na Curacao.
Un Hefe di Redaccion, ta e persona cu legalmente ta encarga cu e contenido noticiero di e corant y e forma cu ta tene na leynan vigente di e pais.
E Hefe di Redaccion tambe ta responsabel pa entre otro seguridad di e personal den un trabao sumente peligroso, manera a bini dilanti na Aruba na diferente oportunidad.
E Hefe di Redaccion mester ta independiente di decisionnan financiero, den e sentido cu un doño di corant no por exigi di un Hefe di Redaccion cu e ta sostene un publicacion cu ta bay contra ley of interes general pero ta contra leynan, incluso leynan moral di un pais.
Jossy Mansur tabata den necesidad di un Hefe di Redaccion pa DIARIO na inicio di añanan 80 y acerca mi persona na Curacao caminda mi a fungi como Hefe di Redaccion di diferente corant ora mi a regresa Curacao despues di un temporada na Hulanda y Merca.
Den caso di Aruba, e peticion di Jossy Mansur pa mi dirigi DIARIO na momento cu Aruba tabata na caminda pa su Status Aparte, a zona straño pasobra na añanan 70 mi tabata Miembro di Conseho Insular di Curacao y asina contra Status Aparte, cu e tempo na Antia Hulandes no a wordo mira como un lucha factibel despues cu den pasado seperacion a wordo bari for di mesa cu cambionan constitucional temporal, cu a keda colga den aire.
Mi prome reaccion tabata “no” debi na mi pasado politico.
Destino a sostene Jossy Mansur y asina pa motibonan familiar importante, mi mester tabata na Aruba na 1982 y Jossy Mansur a probecha pa introduci mi na DIARIO.
Aki mi a topa e Arubiano den ambiente diferente for di mi situacionnan oficial, cu mi a conoce.
E forma cu e Arubiano ta expresa su personalidad propio, ta defende su caracter propio, su identidad como Pueblo, a fascina mi.
Na mes momento, mi a descubri retonan cu ta substancial den bida di un ser humano, mientras cu e base cu Jossy Mansur a pone pa DIARIO, a acentua e sirbishi di periodismo na comunidad.
Jossy Mansur a ofrece mi dirigi un corant den cual e hende y e Pais como comunidad cu ta sirbi tur loke ta parti di e Pueblo, ta central.
Jossy Mansur a percura pa mi wordo introduci na e realidad di e anhelo y a introduci mi personalmente na Arubianismo.
Dia Prome di Januari 1983 mi a bira Hefe di Redaccion di DIARIO na un momento culminante di e historia di Aruba.
Un Hefe di Redaccion mester tene consideracion cu e Pueblo cu e ta sirbi. Aruba tabata pasa den e momentonan mas grandi di su historia.
Mi mester a domina e ortografia di Aruba. Comprende e lucha Arubano y e parti di un Pueblo cu no tabata acepta sin mas loke un historia cu otronan a impone, a entregue.
Mas cu tur cos. Jossy Mansur a haci posibel pa mi acepta, cu mi tabata robez ora mi a bay contra Status Aparte sin conoce e base ni contenido real.
Editorialnan di Jossy Mansur tabata papia pa nan mes, mientras Arubianonan tabata haci maximo uzo di e arma poderoso cu nan a ricibi pa medio di nan propio matutino.
Con mi resumi mi temponan na DIARIO na e momentonan mas dificil pero tambe mas exitoso cu e pais a conoce?
Jossy Mansur tabata semper habri pa duna mi tur informacion necesario. DIARIO a bira un team di hende, cu doñonan cu tabata hende, cu trahadornan cu tabata hende, cu un Pueblo di hende.
Awe nos ta recorda cu DIARIO a cumpli aña.
Con comprimi tur loke a pasa den tur e temponan aki? Con splica con nos a core tras un puma, loke a duna mi oportunidad pa cera conoci cu tur e casnan di Arubiano cu a ricibi mi ora nos tabata na careda pa busca un puma na tankinan di Aruba?
Horcan na caminda pa Aruba, cu mester a bati alarma y tuma tur medida.
Con comprimi historia di DIARIO, cu a exigi mi drenta den accion como persona responsabel pa hasta bida di cada miembro di Redaccion, ora gueriyeronan a sorprende Aruba y a invadi Caya Grandi?
Medidanan cu mester a tuma pa nan no alcansa DIARIO y uza nos imprenta manda nan mensahe na comunidad y mundo. Medidanan cu a exigi mi persona, como Hefe di Redaccion, busca contacto cu autoridad, despues di tuma medidanan preventivo na DIARIO?
Con splica cu finalmente, anochi DIARIO a entrega prueba na autoridad unda e gueriyeronan tabata biba na Aruba prome cu nan a asalta e pais?
Na 2020, Pandemia a bati na porta di Aruba, cu mester a recupera riba tur tereno.Awe mundo ta elogia Aruba cu su logronan grandi.
Awe mas cu nunca, Jossy Mansur ta bibo den nos memoria mientras DIARIO ta sigui skirbi historia di Aruba diariamente.
Nos aplauso ta bay pa señora Nuhad Mansur, sosten di logronan di DIARIO, e matutino di Aruba! Danki pa e confianza, Jossy Mansur!
