Arubaanse Padvindsters Gilde (APG) celebrando 80 aniversario di su fundacion

Dia 12 di Juni, e Organizacion di  Arubaanse Padvindsters Gilde (APG) a cumpli 80 aña den verkenerij, y aunke dos siman despues, e hecho importante aki a wordo celebra. 

Señora Lula Emerencia, miembro di e organizacion, den entrevista cu DIARIO a duna nos mas informacion.

Emerencia a comenta cu no tur e gruponan miembro por a draai completo ainda, despues di e situacion di pandemia cu mundo y nos pais a pasa den dje.

No obstante APG no kier a laga e fecha pasa completamente, sin haci nada pa recorde, y a dicidi pa haci un evento sumamente chikito, cu e gruponan cu por a cuminza draai caba, y esnan cu no por a cuminza ainda, nan a purba di atrae nan miembronan, pa celebra e di 80 aniversario aki, no obstante cu e fecha ta 12 di Juni, pues dos siman a pasa caba.

E organizacion a warda pa tur examen klas y CP, etc., pasa pa e muchanan ta un tiki mas liber den e celebracion.

APG tin mas of menos 200 miembro, pero no tur por tabata presente, Emerencia a reitera.

El a duna di conoce tambe, cu nan a haya bishita di dos hoben cu ta di Israel, ya cu APG ta pertenece na un organizacion mundial, cu ta e Asociacion Mundial di Mucha Muher Scout.

E dos hobennan ta di bishita na Aruba cu vacacion, y nan a tende di e actividad aki y a dicidi di bishita nan pa wak con esaki ta wordo celebra na Aruba. Esey debi cu APG ta un organizacion cu tin hermandad rond mundo, no ta un excepcion cu e dos hoben di Israel a bin celebra hunto cu nan.

E actividad a consisti di un marcha riba e plenchi, cu drum band, y despues a bin paden di e localidad, celebra cu e muchanan. Nan a canta, conta storia, e lidernan mas grandi a relata un tiki di nan experiencia, con nan tabata celebra tempo aya, a haci wega, canto, y despues, den transcurso di aña ora cu tur cos ta full speed, na September ora e actividadnan scout ta bolbe bin bek, lo parti e celebracion den actividadnan mas chikito y cu mas envolvimento di comunidad.