Pabien Maria College MAVO cu nan 71% di alumno cu a slag

Director di Maria College MAVO, Angeline Rosenstand, a yama bon bini na un cantidad grandi di alumno, mayor, y docentenan, cu a presenta, Diabierna traimerdia, na scol pa scucha e resultadonan di Examen Klas.

71% di e alumnonan a slaag na Maria College MAVO. Señora Rosenstand a expresa cu e docentenan a traha hopi duro cu e alumnonan. El a felicita esnan cu a slaag, el a encurasha esnan cu tin un chens mas pa haci herexamen, y esnan cu no a logra e cabesante a bisa nan cu esey no kiermen cu nan no ta bon of a faya of cu no tin futuro pa nan. Esey kiermen cu nan a haya un experiencia mas den bida, y cu nan ta bay prepara pa e siguiente aña si por logra nan diploma di MAVO.

Esnan cu a slaag e cabesante a bisa nan pa bay celebra, pero na un forma responsable y sano. Seguidamente, señora Angeline Rosenstand a yama dilanti e alumnonan cu slaag, esnan cu lo por haci nan herexamen, y esnan cu no a logra e aña aki.

Seccion Hubentud den Movecion tin palabranan di pabien pa e alumnonan aki, y ta desea nan hopi exito den nan siguiente stap y e bunita futuro cu ta spera nan, cu perseverancia y amor pa estudio, y claro Dios nan dilanti. Esnan lo tin herexamen tambe nos ta desea nan tur cos, y pa e alumnonan cu no a logra e aña aki, e porta ta habri y hopi ta depende di nan mes deseo di progresa. Ohala otro aña tur cos bay hopi bon pa nan y cu nan logra domina e materia(nan) cu tabata e piedra riba nan caminda e aña aki. Pabien na e docentenan tambe, pasobra nos Seccion sa cu Maria College Mavo, ta percura pa un ambiente no solamente didactico, pero manera den un famia nan ta.