Aruba tin su prome asociacion di periodista profesional

Lansa durante 'Caribbean Journalism Seminar 2024'

ORANJESTAD (AAN): Durante di e ‘Caribbean Journalism Seminar 2024’, a lansa e prome asociacion di periodistanan profesional di Aruba, Red Arubiano di Prensa Profesional (RAPP), cu participacion di invitadonan internacional, entre nan ta e periodista investigativo Carla Minet.”

            ‘Caribbean Journalism Seminar’ ta e prome evento di Red Arubiano di Prensa Profesional (RAPP) e cual tabatin e participacion di invitadonan special manera:

Luis Anibal Villegas:

A eherce como periodista na Aruba y na e momentonan aki ta traha como ‘freelance’ y ta studiante di Ley na UVA na Hulanda. Villegas a presenta “Lob-generator” un herment pa habitantenan di e islanan di Reino Hulandes por solicita informacion publico mas facil.

Marlon Kock:

Experto den UX a elabora riba "Inteligencia Artificial y con e periodistanan por uz’e manera un ‘timemachine cu ta yuda den e produccion’.

Carla Minet (Orador principal):

Ta un periodista investigativo cu a participa den investigacionnan importante manera Panama, Pandora y Paradise Papers. E ta fungi como  director ehecutivo di Centro Investigativo de Periodismo na Puerto Rico y a presenta e tema “Retonan y Oportunidadnan pa periodistanan den Caribe”.

            Minet a splica e escenario actual na diferente pais den Caribe y e retonan cu periodistanan ta topa. “Ta urgente pa periodistanan investigativo den e region cuminsa traha hunto riba storianan pa asina e pubico ta miho informa di e problemanan cu ta afecta nan y asina tene e forzanan na mando responsabel.

            Tambe ta importante pa traha hunto den e region pa asina por yuda otro, mirando e scarsedad di apoyo cu periodistanan tin, specialmente den cubri temanan dificil na unda no tin recursonan suficiente y cu ta imposibel pa eherce e trabao sin cu hende conoce bo of por haya un otro trabao”, e ta splica.        Durante e seminario a conta cu un sala yen di periodista y invitadonan hopi interesa pa haya sa un poco mas di e temanan presenta haciendo e evento uno hopi special dunando contenido na introduccion di RAPP na Aruba.

RAPP

            Red Arubiano di Prensa Profesional (RAPP) ta un organisacion sin fin lucrativo y ta dedica na stimula e practica liber di periodismo y standard di comportacion etico.            

            RAPP ta traha pa inspira y educa e periodistanan actual y futuro periodistanan pa medio di desaroyo profesional y proteha e garantianan fundamental di libertad di expresion y libertad di prensa.  

            E organisacion a establece su mes oficialmente como un asociacion, siguiendo e guianan etico di Nederlandse Vereniging van Journalisten (NVJ).  

            For di januari, e fundadornan di RAPP, e periodistanan Melissa Stamper, Andreina Morillo y Yorleny Oduber, a bin cu e idea di crea un colectivo pa asina profesionalisa prensa na Aruba e cual ta hopi necesario. Nan a reuni frecuentemente pa asina yega na un vision conhunto y di e forma ey a nace RAPP.

            E periodistanan cu kier afilia nan mes of kier mas informacion por tuma contacto na e siguiente e-mail: This email address is being protected from spambots. You need JavaScript enabled to view it.

            RAPP kier gradici e sponsornan cu a haci e seminario aki bira un realidad.