Bureau Traimerdia a cumpli 28 aña di existencia

Hefe di BTM, Marlene van der Linden:

ORANJESTAD (AAN) – Marlene van der Linden- Hefe di Bureau Traimerdia, a duna DIARIO informacion tocante e celebracion di 28 aña di existencia di Traimerdia, cu a wordo celebra Diabierna cu a pasa.

Dia 16 di September ta e fecha cu Bureau Traimerdia a cumpli 28 aña di existencia, cual a inicia como un proyecto, pero na aña 2021 a bira un “overhuis dienst”.

Van der Linden a menciona cu Bureau Traimerdia ta e unico naschoolse of social opvang cu ta accesibel pa henter e poblacion di Aruba. E ta consisti di un total di 72 empleado y tin 800 mucha, cu un lista di spera di 300 mucha.

“Bureau Traimerdia ta brinda cuido di calidad despues di orario di scol, dus pa mayornan por traha trankilamente den e area laboral. Nos tin ocho centro, ubica na diferente distrito y nos ta brinda naschoolse opvang di muchanan di 4 te cu 12 aña, di onderwijs regular pero tambe di special onderwijs”, Marlene van der Linden a splica.

El a duna di conoce cu locual nan kier ta pa den henter e aña escolar sikiera un bez pa aña full Bureau Traimerdia “come together”.

“Esaki ta rekeri hopi structura y organizacion mirando cu ta 800 mucha. Awe nos a celebr’e cu un sport dag, door cu nos ta promove e parti saludabel di nos muchanan. P’esey nos ta na Centro di Bario Dakota y e muchanan a haya un triet, y a trece e aspecto familiar cu BTM ta boga p’e”, Van der Linden a comenta.

Pa Bureau Traimerdia un reto grandi cu nan tin ta e lista di spera, pasobra manera ta conoci, tin stop pa tuma personal den henter e aparato gubernamental, y mester wak con, den e temponan nos dilanti con por lose up esaki.

Bureau Traimerdia tin hopi plan, manera e recapacitacion di tur e empleadonan pa nan haya e hermentnan necesario pa por guia e muchanan. “Manera nos sa, e problemanan social ta bira dia pa dia mas grandi, y e muchanan aki ta rekeri mas atencion pa nan por deal cu nan”, Marlene van der Linden, Hof di Bureau Traimerdia a señala.

Finalmente, el a expresa palabranan di danki na tur BTM su profesionalnan, y coleganan cu a haci e dia aki posibel, cual a rekeri dedicacion y hopi organisacion. Tambe gradicimento na tur stakeholders, y tur persona cu directo of indirectamente, a yuda Bureau Traimerdia durante su 28 aña di existencia.