Segun UNESCO: Cada dos siman, den promedio, un idioma ta disparce
ORANJESTAD (AAN): E idea pa celebra Dia Internacional di Lenga Materno a bin di un iniciativa di Bangladesh. A wordo aproba durante e Conferencia General di UNESCO na 1999 y a wordo observa rond mundo desde aña 2000.
UNESCO ta kere den e importancia di diversidad cultural y linguistico pa sociedadnan sostenibel. Den e marco di su mandato pa paz, nan ta traha pa preserva e diferencia di culturanan y idiomanan cu ta fomenta tolerancia y respet pa otro.
Sociedadnan multilingual y multicultural ta existi danki na nan idiomanan, cu ta transmiti y preserva conocemento y culturanan tradicional di manera sostenibel.
Diversidad linguistico ta keda menasa cada biaha mas. Cada dos siman, den promedio, un idioma ta disparce, cu su desaparicion ta trece cu ne un herencia cultural y intelectual completo. 40% di e poblacion mundial no tin acceso na un educacion na un idioma cu nan ta papia of compronde. Sinembargo, danki na comprension di e importancia di idiomanan materno, a logra avance den educacion plurilingual, particularmente for di estudionan inicial y e compromiso cada biaha mas grandi pa nan evoluciona den esfera publico.
E tema di e celebracion di Dia Internacional di Lenga Materno 2024 ta 'Educacion multilingual: un pilar di e siñamento intergeneracional.
Na e momentonan aki, tin 250 miyon mucha y hoben cu ainda no ta bay scol, y 763 miyon adulto cu no ta domina e competencianan basico di lectura y skirbimento. Educacion den lenga materno ta sostene e proceso di siñamento, alfabetisacion y adkisicion di idioma adicional.
