Aruba tin e crisis di salud pa Covid 19 domina

ORANJESTAD (AAN) – Prome Minister Evelyn Wever-Croes, a hiba palabra den conferencia di prensa di gobierno, Dialuna mainta, y a trata e tema “Recuperacion”.

Prome Minister a cuminza refiriendo na e cifranan di e casonan di Covid-19 cu tin na e momentonan aki.

“Nos por mira cu nos ta na 20 caso positivo, entrante awe. Tambe nos por mira cu nos tin un average di tres caso nobo pa dia. E positivity rate ta awo na 5% den un promedio di siete dia, y esaki ta pone pues, cu nos por bisa cu nos tin e parti di crisis di salud, domina!” e dignatario a expresa, mustrando e cifranan aki riba grafico.

Esaki combina cu e exito di e campaña di vacunacion, e mandatario a subraya, na e momentonan aki, "nos ta na 67% di nos poblacion, vacuna caba". Minister Presidente a menciona cu esaki ta e poblacion general, pero gobierno kier yega na 85%.

“Pa esaki nos tin campañanan adicional ta bay cuminza. Mi kier remarca cu den e gruponan di esnan di 60 plus, nos ta aworaki na 71.8%, casi 72%, y nos kier yega 85%. Kiermen, nos ta bayendo hopi, hopi bon caba, pa loke ta trata e vacunacion. Tur esaki ta pone cu aworaki nos ta sigui den e Crisis Plan, pa nos traha riba e parti di recuperacion; riba e ‘herstel fase’. Pero, nos ta keda alerta, nos ta keda vigila, nos ta keda evalua cada tres dia, pasobra te ainda ta mustra cu e cifranan ta bahando. Durante e simannan e ta lanta un tiki, despues ta baha bek, y pesey nos ta traha cu averahenan di cada siete dia ” Minister Presidente a señala.

E dignatario a indica cu si gobierno ta ripara cu e cifranan mester di un otro atencion, mas stricto, claro cu lo tuma esey mesora, pero aworaki nan ta bay enfoca mas, riba aspectonan di recuperacion. Esaki Prome Minister a reitera.