Debate mester tabata huicio pa Mike cu ya na 1986 a conoce empleo paga di Aruba - *Herencia di Mike ta motibo di medidanan financiero y un economia rehen di Citgo - *Mike kier voto pa Parlamento pa cual el a huy pa motibo di e berdad di su abuso
ORANJESTAD (AAN) — Na 1986 Mike Eman a base di e logro di Betico Croes, cu ta Status Aparte, a bira parti di e prome Gobierno di Aruba.
Como family di Prome Ministro Henny Eman, Mike a haya un trabou cu a haci posibel pa e bira “friend” di Aruba. Mike Eman a bira e angelito di AVP, ora su ruman Henny Eman a bay sinta riba e stul cu pa derecho tabata di Betico Croes.
Mike Eman por a bira relacionista publico di e prome gobierno di Aruba a base di un traicion electoral na 1985, ora despues cu Betico Croes a logra crea e puesto di Prome Ministro di Aruba, AVP a traha e trampa di coalicion di partidonan hasta contra Status Aparte.
Asina Mike Eman a haya empleo den Conseho di Ministro como family directo di su ruman.
Mike a bira parti di mundo politico, ora a crea un posicion paga pa su persona como sombra di su ruman y angelito di AVP.
Mike Eman a logra amor di tur hende. E tabata brasa y e tabata sunchi. Mike tabata parti di gobernacion di AVP
Ora a bira tempo pa Henny Eman bay cas, Tico Croes mester a drenta. Pero Tico tabata Croes. Na un forma of otro Tico mester a hala un banda sigur ora e scandal di e caso Fondo Desaroyo Nobo San Nicolas a resulta den libertad pa Henny Eman y condena pa tres Ministro. E libertad di Henny Eman a wordo apela door di Ministerio Publico y e condena di e tres Ministronan door di e Ministronan.
Pero e apelacion a para den un situacion historico na beach di Aruba, caminda Ministerio Publico y miembronan di AVP a yega na un acuerdo.
Mike Eman por a sigui habri caminda pa realisacion di su soño di bira Prome Ministro di Aruba.
Ora mira atras Mike a percura pa tur cos tabata na su luga. Hasta un canal di television cu a haci cu e no tabata depende di Tele Aruba y cu tabata na su disposicion.
Mike a lansa su mes como Prome Ministro angelito perfecto, e yiu cu tur mama lo a desea pa nan tin.
Ora BBO a bati na porta, Mike a gara na BBO y a bira candidato den eleccion cu e promesa cu e ta deshaci di BBO, loke e no a logra.
For di e momento Pueblo mester a cuminsa pensa, cu algo tabata robes. Pero Mike tin e don special di angelito cu ta pone hende cuminsa yora for di ora cu nan mira su cara.
Mike a haya mas voto na 2013 ora ya el a logra pa e barco Aruba cuminsa zink. Ora na 2014 Hulanda a bin bati na porta di Aruba pa evita cu Mike lo a mata futuro, Mike a organisa un show total den Fort Zoutman y a duna prueba di su don manipulador cu e ta regalo mas grandi cu el a ricibi ora el a nace.
For di Cuba comunista, Mike a trece Nicolas Maduro y su Citgo, cu a bira perdicion total di Aruba cu Mike a haci core tras di fantasia.
Ta hustamente fantasia ta e nomber mas apropia pa Mike Eman cu na 2017 a perde eleccion y a disparce.
Awe no mester di un debate, pero mester tin un huicio politico pa Mike Eman revela su concenshi na Pueblo.
Awe no mester di debate pero mester di un huicio politico pa Mike Eman splica anciano y hubentud pakico como angelito el a destrui Aruba, a laga Aruba den miseria, a laga Aruba den man di supervision Hulandes.
Awe no mester di debate pero mester di huicio politico pa e angelito Mike Eman bin splica Pueblo unda el a bay sconde ora na 2018 refineria di Aruba por a bira juguete di Rusia y poder comunista.
Awe no mester di debate, Mike Eman mester bisa kico el a haci cu placa di Aruba cu a sufri hamber, cu a pasa den miseria, cu mester a presta placa di Hulanda ora Covid-19 a bati na porta.
Awe e figura central pa contesta tribunal di Pueblo ta e angelito Mike Eman cu a percura pa e situacion financiero y economico cu casi a zink Aruba na 2018 pero tambe a dicidi cuanto tur Arubiano for di 2018 mester a paga na belasting y na interes pa generacionnan cu ta bini.
