Gobierno Wever-Croes ta papia di un recuperacion cu tur hende ta mira - *Logro di Wever-Croes den pandemia pero tambe espectaculo manera Marisol - *Aruba ta subi un caminda nobo pero ainda tin politico cu tin hopi pa splica
ORANJESTAD (AAN) — Un siman sumamente interesante a habri. Un siman prome cu e siman cu Aruba meser bay urna electoral pa dicidi riba e futuro gubernamental di Aruba.
E cantidad di partido cu a bati na porta, ta duna prueba cu situacion a drecha na Aruba y caranan cu Aruba no a spera riba podium, awe ta presenta dilanti Pueblo no necesariamente pa drenta Parlamento pero pa bira Ministro.
DIARIO den e dianan aki ta analisa tur loke ta pasa den mundo politico di Aruba, cu ta marca pa loke ayera a wordo presenta como e berdad nobo di Aruba, cu ta conoce un recuperacion economico.
Por a spera cu situacion di Aruba a mehora ora tuma nota di informacionnan concreto for di mundo di turismo entre otro y manera a bisa e cantidad di hende cu ta para den fila pa haya un puesto politico den Gobierno of den Parlamento.
Awe DIARIO mester mira atras riba e tempo tras di lomba y den cual francamente nos tabata puntra nos mes si Aruba lo a logra un recuperacion manera el a spera y planifica na 2020 ora mundo a bini abou pa e isla turistico.
Ta evidente cu diferente factor a haci cu awe Aruba por papia di recuperacion. Na prome luga mester tuma nota di e cantidad di casonan di Covid-19, hasta ora e uzo di tapaboca no ta un exigencia legal mas.
Aruba a haci uzo di e maneho dirigi di Gobierno Wever-Croes pa vacuna Pueblo di Aruba. Awe figura di Prome Ministro Wever-Croes y Ministro Dangui Oduber sigur ta bini dilanti sinta pa wordo vacuna como ehempel pa henter Aruba.
E medidanan cu Minister Glenbert Croes a tuma riba tereno social y sin duda e accionnan rapido di Ministro di Asuntonan Financiero y Economico Xiomara Maduro.
Gobierno Wever-Croes a confronta un reto grandi pasobra e problema di Aruba no tabata solamente Covid-19 pero cantidad di scandal cu mester a atende tambe.
Sigur mester papia di e scandal serio cu a presenta cu Marisol Lopez-Tromp, cu a uza sala di Parlamento como su teatro den su pelea cu su propio partido cu el a opta pa fungi como su vehiculo durante eleccion 2017 ora el a drenta Parlamento pa POR.
Na cierto momento e situacion cu Marisol Lopez-Tromp a crea hasta tabata inaceptabel pa e Pueblo di Aruba, cu a sinti falta di respet di Marisol, cu awe a resulta di a uza e tempo di pandemia pa duna trato preferencial na su famia cu tereno den tempo di pandemia ora tur servicio na pueblo di Aruba a wordo tranca pa motibo di e malesa.
Marisol atrobe ta cu su partido, den cual su famia y circulo directo ta bon representa, como participante na eleccion 2021 cu manera ta e caso cu tur proceso electoral di tur tempo, ta haci cu gobierno ta demisionario.
Ora analisa e loke a pasa na 2020, por nota cu pa Departamentonan di Gobierno y instancianan cu mester produci rapportnan, tambe 2021 tin su reto pasobra nan mester atende cu retraso y schedule special cu nan mester a inclui pa por a sigui traha na 2020.
Awe un elogio ta bay na Gobierno Wever-Croes pero tambe e instancianan oficial di Aruba y tur Arubiano cu na un forma positivo a aporta pa Aruba por a sigui cana.
Recuperacion no ta solamente di Gobierno pero di henter un Pueblo luchador, cu sigur e Pueblo di Aruba ta manera atrobe a keda demostra den tempo di pandemia.
Aruba ta subi un caminda nobo. Cu cooperacion di Pueblo pa tene e cifra di Covid-19 abou, Aruba ta enfrenta un futuro nobo cu ta mustra alentador manera DIARIO lo presenta e siman aki cu cifra mientras tambe nos lo sigui atende y analisa.
