ORANJESTAD (AAN): E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais.
Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo uza pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0-15 aña).
E relato di CPI pa luna di September 2025, emiti pa Oficina Central di Estadistica ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).
Na September 2025 e bestaansminimum mensual pa un hogar cu ta consisti di dos (2) adulto y dos (2) mucha (edad 0-15 aña) (Afl.5,521) ta mustra un caida di Afl. 5 compara cu September 2024 (Afl. 5,526) y a wordo causa principalmente door di caidanan di Afl. 13 y Afl. 6 den e sectornan di “Paña y sapato” y “Mobilario”. E subida mas grandi na September 2025 a wordo registra den e sector di “Cuminda y bebida no-alcoholico” (Afl. 12).
Na September 2025 e bestaansminimum mensual pa un hogar cu ta consisti di un solo adulto ta Afl. 2,629, cual ta representa un deficit di entrada di Afl 643, un caida di Afl. 2 compara cu e deficit observa un aña pasa (Afl. 645). E deficit aki ta e di tres mas abou registra den un periodo di seis (6) aña pa luna di September.
