Aruba ta keda confronta cu scarcedad grandi di nurse na Aruba

Angelo Anthonij di ODEA

• Mester urgentemente mas hende pa bira enfermero
• Tin di stimula scolnan pa guia hobennan den esaki 

ORANJESTAD (AAN):  Vice Presidente di Organisacion di Enfermero Aruba (O.D.E.A.), Angelo Anthonij, a revela durante un entrevista cu  mester mas hende pa bira enfermero.

            El a duna di conoce cu e trabao di e nurse ta hopi importante no solamente na hospital, pero den Ambulance, Wit Gele Kruis, y den tur instancia cu tin di haber cu cuido.

            Pero banda di esaki ta wak cu tin un scarcedad tambe pa e profesion aki.  Por ehempel, Hospital mes mester a pidi hende di afo pa yuda locual ta haci cu e no ta un reto facil. Esey ta pone cu mester a traha un plan pa si algo asina pasa den futuro pa ta miho prepara, a bisa.

            Awendia kier motiva mas hende hoben of studiantenan pa haci e trabao aki. No ta un trabao facil. Ta un trabao cu mester tin dedicacion p'e y esey ta pone cu mester bay scol pa y stimula hende pa drenta den e funcion aki, segun Anthonij.

            El a sigui splica cu ODEA tin un plan unda ta purba di haci esaki na scolnan manera Colegio EPI pa stimula pa nan tuma e estudio aki pa e ta un trabao cu tin cu traha p'e, pero cu ta un trabao hopi dushi.

            Scarcedad no ta algo di Aruba pero tambe mundialmente tanto loke ta enfermeria basico, pero tambe specialisa. Tin un scarcedad grandi tambe di docente, a remarca.

            Esey ta e reto di mas grandi cu tin actualmente, pero cu poco poco ta logrando toch cu por domina e situacion actual, a señala.

   Den pasado DIARIO a yega di publica caba riba e scarcedad aki, y e tempo ey Redaccion a haya monton di ex-alumno di Colegio EPI kendenan tabata buscando forma pa bira Enfermero, pero nan a sinti cu ora nan bay core stage of purba traha na Hospital, nan tabata haya hopi “contratiempo” intencionalmente imponi riba nan door di nurse existente.  E ex-alumnonan e tempo ey a mustra cu nan a wordo asina hopi influencia, cu nan a dicidi na cambia di careda y busca otro rumbo.  Otronan a bay traha den Hotel, y tin cu hasta a bay Scol pa Polis y despues a bira agente policial.

   Pues tin di haci algo pa yuda ‘vang op’ e alumnonan aki, y ban spera cu e impulso positivo lo por duna nan mas gana di sigui studia pa bay traha como Nurse.

   Cu scarcedad ta tur caminda, por a nota recien den un noticia publica den DIARIO, unda a nota con Curacao Medical Center, e Hospital di e isla ruman cu a hasta cancela varios operacion debi cu nan tin scarcedad di personal.