Mike a zink AVP na un momento di oro pa partido di oposicion
- Con un lider cu a destrui su partido, por dirigi un pais??
- Grupo di hoben di awe di AVP ta despedi di grupo di hoben 2009
ORANJESTAD (AAN)- Pa cualkier persona cu tin algun conocemento di politica, e momentonan cu Aruba y mundo ta experencia actualmente, ta oportunidad di oro pa partidonan den oposicion.
Nos tuma paisnan grandi, por mira con lidernan na mando mester lucha contra oposicion debi na e cantidad di problema cu ta haci gobernacion un tarea enorme.
Na 2017, Mike Eman cu su team cu a fracasa cu Aruba, manera ta un hecho cu e proyecto di Citgo, cu a pone mundo haci bofon di Aruba, a logra convence otro grupo pa presenta nan mes como cara hoben.
Nan mester a reemplasa e team di hoben di Mike Eman, cu a drumi for di 1986 manera cayman na boca di riu pa e haya e puesto di dirigente di Aruba, cu el a uza pa destrui Aruba.
Semper DIARIO a splica cu husticia ta haci su mes. Bo por trata di sconde solo cu un dede, manera Mike a haci na 2010, ora e mes a splica Pueblo cu e no por kita e otro mitar cu a resta di BBO pasobra esey lo a zink Aruba.
Bueno, el a uza palabranan diferente naturalmente, mientras e tabata regala brasa y sunchi di un Pueblo cu a keda den un desastre financiero cu ta simbolisa e amor di Mike Eman pa su pais.
Na 2014, Hulanda a pone fin na fiesta di Mike, cu a bay busca Nicolas Maduro pa ciega Aruba cu Citgo, loke no a resulta y Mike a keda na lagrima den su penthouse.
DIARIO na 2018 a cuminsa presenta Aruba e historia real di Mike Eman cu a laga Aruba cu 12 peso na pia di Aruba y 8 peso na gargante di e pais, cu el a hiba na estado di bancarota.
Na 2017 ora tabata evidente cu el a destrui Aruba, el a desaparece pa bolbe presenta despues di Covid-19.
Esaki tabata e momento di oro pa Mike Eman, ya cu e pandemia a hinca henter mundo den desesperacion den tur sector y tambe riba tereno financiero.
Mike no a logra, pasobra husticia a haci su mes.
Awe e grupo di hobennan cu a sigui Mike Eman na 2017 cu e pensamento cu ta hoben ta manda den AVP, a bandona e partido den un confrontacion cu e hobennan di 2009, cu Mike Eman na cabez.
Na 2023, e grupo cu por wordo considera prominente pa AVP y cu mester a bira futuro lidernan di AVP, a bandona e partido den e guera interno cu a rementa den e partido a base di preferencia di Mike pa sostene su amigo del alma Benny Sevinger cu Huez a manda prison.
Benny Sevinger ta bolbe marca historia di AVP, despues cu Mike Eman a percura pa e ta riba lista di eleccion di AVP y pa e haya e votonan necesario pa drenta Parlamento como acusado di un crimen.
Awor Mike Eman ta insisti pa Benny Sevinger keda den Parlamento y ta bay contra sentencia di Huez pa e sostene Benny Sevinger.
Na 2009, e tempo den cual Mike lo a sacrifica Aruba pa e hunga politica cu bienestar di e pais, a haya su inicio.
Mike Eman a destrui Aruba. Hunto cu Benny Sevinger el a bira protagonista di e proyectonan Bo Aruba cu hunto cu e debe nacional cu el a crea pa kibra futuro di e pais, el a pone Aruba den man di Reino Hulandes, bou supervision.
Awe despues cu el a destrui Aruba, Mike a destrui AVP y a entrega na Pueblo e loke ta su pakete berdadero di moral cu ta un bofta den cara di Aruba.
Mike Eman a destrui AVP y a destrui oposicion, despues cu el a skirbi su historia como destructor di Aruba.
Benny Sevinger pa Mike a resulta mas importante cu tur otro miembro di e partido cu sea ta sostene Benny Sevinger of ta bandona AVP, pasobra obviamente pa Mike nan no tin e balor cu Benny Sevinger tin.
Husticia ta haci su mes y awe Mike Eman den Parlamento di Aruba mester kita su disfraz!
Un pregunta ta keda atras. Con un hende por dirigi un pais despues cu el a destrui hasta su partido?
Con Mike Eman por sigui ofrece su mes como lider di Aruba, si el a destrui su partido?
