ORANJESTAD (AAN): Dialuna marduga pa 2’or, un unidad di Polis di Playa a ser manda urgente pa un adres na Bushiri, unda habitantenan a gara un ladron den cas, y nan tine fuertemente wanta.
Ora cu Polis a yega, nan a bin nota cu e habitantenan tin e ladron bon wanta, y nan a tume over.
E habitantenan ta famia M. consistiendo di un homber y su ruman muher. Polis a reconoce e sospechoso como e homber di inicial L.
A haya sa cu L. a drenta e cas via e bentana di baño cu tabata habri. E boroto aki ta loke a pone e homber M. spierta, y el a mira e intruso banda di su cama. Ora e intruso a ripara cu e persona a spierta, el a ranca careda sali via e gang di cas, pero a wordo gara door di M.
Aki ta unda cu nan a cuminza lucha cu otro, y esaki a escala te den camber di e ruman muher M., te ora cu e ruman a logra di domina e ladron, y a core yama Polis.
E sospechoso tabatin su cabez tapa cu un T-shirt preto. E tabatin varios articulo poni cla caba pa bay cu nan. Tur esaki a wordo confisca pa asina investigacion por tuma su rumbo.
Polis a hiba e intruso L. pa Warda di Polis na Shaba, unda Fiscal Auxiliar a duna ordo pa e keda encarcela mesora.
