Aruba ta expresa su solidaridad cu Senador Colombiano Miguel Uribe despues di intento di asesinato

ORANJESTAD (AAN): Prome Minister mr. Mike Eman y su esposa Doina, den nomber di Gobierno di Aruba,

ta expresa nan mas profundo y sincero sentimento di solidaridad y preocupacion na e famia di Senador Miguel Uribe di Colombia, despues di e lamentable atentado contra su bida.

   E atentado aki a conmove e comunidad di Aruba profundamente. Un atentado contra un lider democratico no solamente ta un dolor personal pa su famia, pero tambe un herida na e balornan democratico cu nos tur ta comparti como pueblo y como region. "Awe, nos ta sinti e sufrimento hunto cu su famia y cu henter e pueblo Colombiano". Prome Minister a expresa.

   Nos ta pidi Dios pa duna fortalesa, paz y consuelo na Senador Uribe, su sernan keri y su comunidad. Nos ta haci oracion pa su pronto y completo recuperacion. Ta hopi importante pa nos, como pueblo Arubano, mustra cu nos ta un pueblo solidario, cu ta para hunto cu otro pueblo den momentonan dificil.

Prome Minister Mike Eman a tuma contacto cu e Consul General di Colombia na Aruba, sr. Gustavo Serrano Amaya, pa expresa di manera oficial e apoyo y cariño di e pueblo Arubano. E mensahe ta cla: Aruba ta para solidario na banda di su pueblo ruman di Colombia.

   Gobierno di Aruba ta rechasa categoricamente tur forma di violencia, y mas ainda ora violencia ta purba pone obstaculo na e yamada democratico di lidernan cu ta traha den nomber di nan pueblo. Mester defende democracia cu palabra, accion, y cu union.

   Cu Dios fortalece Miguel Uribe, consola su famia y guia nos tur riba un caminda di speranza comprension y respeto mutuo.