Minister President Mike Eman:
ORANJESTAD (AAN): Meymey di un Caya Grandi yena cu miles y miles di ciudadanonan entusiasma cu e exito grandi di e iniciativa pa reactiva Caya Grandi, Minister President Mike Eman, a comparti cu prensa su alegria cu e exito aki tambe.
Den apenas dos luna despues di tuma e responsabilidad di goberna, Prome Minister Mike Eman ta sinti cu e gobierno nobo di AVP-Futro ta logrando resultadonan concreto pa pueblo di Aruba, mehorando bida di nos hendenan y un sentimiento cla di un direccion nobo basa riba dignidad, cuido y comunidad. Un rumbo cu ta dunando perspectiva.
“Nos mision ta cla,” Prome Minister Eman a bisa. “For di Noord te San Nicolas, for di bario te ciudad, for di hubentud te anciano — e Bon Comun ta nos guia den cada paso cu nos ta tuma.” Eman ta para keto na cambionan cu ta mustra e direccion cu e gobierno nobo ta encamina ta pa e pueblo henter, e BON COMUN.
Un aumento di Afl. 250 pa tur pensionado, duna yudansa directo na e mayor di edad cu a traha su parti pa nos sociedad.
E reintroduccion di un pakete di remedi mas completo cubri door di AZV, pa garantiza cu cada cuidadano tin acceso na cuido di su salud y remedinan necesario pa biba cu seguridad y dignidad.
Inicio di un programa nacional pa haci limpi y mantene e barionan, cuminsando den Noord, Village y Bushiri — trece orguyo back den nos espacio publico y fortalece e corazon di comunidad.
Un reset di e revitalisacion di Centronan di Ciudad Oranjestad y San Nicolas. E gran evento cultural den Caya Grandi, e mas grandi cu a yega di tuma luga - un senjal cla cu Oranjestad ta renace como un centro di cultura, comercio y bida social.
“E decisionnan aki no ta aisla,” e Prome Minister a enfatisa. “Nan ta muestra cla di un renovacion profundo — un gobierno cu ta scucha, cu ta importa, y cu ta pone e hende prome. E ta parti di un vision a largo plaso caminda progreso economico y hustisia social ta bay man den man.”
Prome Minister Eman a reafirma cu e gobierno lo sigui traha riba base di Bon Comun, como e principio permanente pa cada desision y direccion.
“Nos lo sigui traha bario pa bario, hende pa hende te cu tur ciudadano por compartí den e promesa di un miho mayan.”
Prome Minister Eman a sera su declarcion cu un yamada pa union y inspiracion compartí:
“Esaki ta solamente e cuminsamento. Cu Fe, Speranza y Amor como nos fundeshi — y cu e Bon Comun como nos guia — nos lo traha un Aruba cu prosperidad comparti, oportunidad pa henter nos pueblo.”
Pagina 17 por mira mas di e ambiente na Ban Bek Caya.
