Minister Wever tambe ta kere:
- Esaki pa reduci costo di transaccionnan local
- Peticion ya caba duna na Banco Central prepara esaki
ORANJESTAD (AAN): Minister di Finansas, Geoffrey Wever a duna di conoce cu el a informa Banco Central cu Aruba mester bay over na e plataforma nacional di pago caminda tin e control riba kico e ta e cargonan cu ta wordo cobra na Aruba riba e transaccionnan cu ta netamente local.
Wever a sigui bisa cu esey ta un peticion cu a wordo duna na Banco Central pa prepara esaki. E mandatario a bisa cu e ta den spera di nan lo realisa esaki.
Minister Geoffrey Wever a remarca cu esaki ta un prioridad di gobierno y ta algo cu ta den proceso ainda, pero e peticion a wordo haci na Banco Central. Ta spera cu dentro di poco lo por tin mas claridad riba e topico aki.
E titular di economia a bisa cu mester crea un plataforma local sin cu e 'fees' ta bay afo y sin cu ta dependiente di e 'fees' cu e institutonan internacional ta cobra. Banconan por tuma e iniciativa pa haci esey, pero gobierno no por obliga nan pa hacie.
Locual si por hacie ta crea e plataforma pa asina tur hende uni na e plataforma ey pa asina reduci e costonan di transaccion. Tin un ley den preparacion pa regula e 'fees', pero ainda ta haya cu si e plataformanan internacional ta cobra cierto 'fees' na e banconan local y ta prohibi nan pa cobra e cliente, ainda e banconan ta keda cu e gasto adicional, e minister a splica. Esey por genera otro impacto.
Si tin un plataforma local, cu ta mas barata, por baha e peso cu tin riba economia. Traha riba esey ta un prioridad, Wever a finalisa bisando.
Manera ta conoci, ultimo temponan hasta e gremio di comerciantenan a splica con gastonan pa haci transaccion di debito a subi astronomicamente y esaki na su turno lo bay nifica cu prijs di producto y servicio tambe lo subi.
E ta dunando mas forza tambe na e grupo cu semper ta grita cu ‘Cash is King’, y e ta cuminza mustra un bon idea. Pero atrobe ta bolbe corda riba dolor di cabez ora cu ciudadanonan ta canando rond cu demasiado cash den cartera of tas.
A lo menos awor tin indicacion cu Gobierno tin atencion pa e caso aki tambe.
