Aruba su beyezanan dunando un bon presentacion na Puerto Plata

ORANJESTAD (AAN): Informacion ricibi for di Republica Dominicana, ta indica cu e 4 hobennan cu a bay representa Aruba, ta haciendo esaki cu tur orguyo y amor.

   E prome actividad cu e hobennan a pasa aden ta e instalacion y nan a haya nan sjerp oficial pa nan

participacion na e evento di Festival del Talento y la Belleza Internacional 2022 organiza na Puerto Plata, Republica Dominicana door di Agnes Models.

   E atencion ta grandi pa nos muchanan, tanto Thaheeli Geerman (Mini Model Aruba), Annabell Bislip (Little Beautiful of the World), Maya Gordon (Pre-Teen Model Aruba) y e simpatica Tanique Chan (Miss Teen Model Aruba).

   Sigur e competencia ta bay ta fuerte, pero tin tur e confianza cu e hobennan di Aruba ta bay resalta.  DIARIO a compronde cu participantenan di otro paisnan tambe a yega, esta Puerto Rico, USA, Venezuela, Peru, Isla Catalina y Republica Dominicana.

   Aruba ta conoci di tur aña ta conquista premionan maximo y DIARIO ta sigur cu e aña aki tambe nan lo regresa cas cu hopi premio maximo.

   The Chaz Modeling & Talent School sigur lo guia y sigura pa nos muchanan haci un bon papel na Puerto Plata. Awe Diahuebs nan lo tey na e competencia di Trahe di Fantasia, Diabierna lo tin e Talent Show y Diasabra 10 di juli 2022 anochi lo ta e gran final.