Aruba One Happy Island Lions cu exitoso charla riba diabetes

ORANJESTAD (AAN):  Relaciona cu Dia Mundial di Diabetes dia 14 di november ultimo, e cuatro organisacionnan a uni pa hiba un campaña di control y prevencion di e malesa Diabetes door di informa, educa y conscientisa nos comunidad.

E tema di dia Mundial di diabetes 2021-2023 ta “Access to diabetes care”. Diabetes ta un epidemia global cu ta afecta hende homber, muher y muchanan diariamente rond di mundo. Diabetes ta un di e causanan principal di malesa cardiovascular, ceguera, problema cu riñon y amputacion di pia. Diabetes a causa mundialmente 6.7 miyon morto den 2021.

   Segun cifranan den 2021 un total di 537 miyon adulto (1 den cada 10) ta sufri di e malesa diabetes. Ta ser calcula cu esaki lo subi te 643 miyon pa 2030 y 783 miyon pa 2045.

Bringa y evita e malesa diabetes ta un di e focusnan di Clubnan di Lions y como organisacion nos ta kere den prevencion y hunto cu otro organisacionnan ta apoya educacion y prevencion di e malesa diabetes den nos comunidad.

   Nan a organisa recien un anochi di chekeo combina cu un Charla Interactivo na MFA Noord cu e tema: “Kico bo sa di diabetes y Cuanto riesgo bo ta core pa haya Diabetes?”.

For di 6.30 pm pa 7.00 pm tur esnan cu a yega MFA Noord por a haci un checkeo gratis di sucu y presion. E enfoke di e charla tabata pa comunidad hiba un bida saludabel y evita di haya e malesa di Diabetes. Esnan presente a haya informacion y por a haci pregunta y ricibi contesta.

Ademas nan a wordo brinda un cup di sopi di pampuna, un appel y un boter di awa como tambe foyetonan informativo. Un anochi resulta exitoso pa cual ta gradici tur participante.

   Aruba One Happy Island Lions Club ta gradici specialmente Fundacion Diabetico Aruba, Praktijk Ondersteuner Huisartenzorg (POH) pa e presentacion, chekeo y control y tambe na Cede Aruba, Utilities NV, Bingo Aruba, Setar NV, Centro di Bario Noord y MFA Noord pa nan aporte pa por a realiza e evento aki.