Atakenan di Geert Wilders den Parlamento Hulandes ta un alerta
- Den Parlamento Wilders a yama Caribe Hulandes piña colada
- Forsa di Wilders ta entrada y produccion Parlamento Hulandes
ORANJESTAD(AAN)- Ora papia di un politico populista, mester pone atencion na dos aspecto.
Na prome lugar cu e persona ta capaz pa mishi cu e parti cu ta haci Pueblo mas dolor pero tambe cu Pueblo ta mas inclina pa den problemanan duna validez na su posicion.
Informantenan den contacto continuo cu DIARIO a mustra cu na e momentonan aki e unico Gobierno cu por confronta Geert Wilders y e otro partidonan cu awor mester percura pa nan por goberna cu Wilders, ta Gobierno di Aruba, encabeza pa Prome Ministro Wever-Croes cu a dirigi un Gobierno na un forma, cu e ta deshaci di critica costumbra contra politiconan.
Sumamente importante den Reino na e momentonan aki ta, e resultadonan directo cu cada dirigente di Gobierno por presenta y mundo politico di Reino ta di acuerdo cu Evelyn Wever-Croes tabata e unico Prome Ministro cu a logra saca su su pais for di un desastre financiero y entrega e pais un saldo positivo.
Manera DIARIO a splica na hopi ocasion, na momento cu tension politico den reino ta rementa, e firmesa financiero cu cual Gobierno Wever-Croes a maneha Aruba, ta haci cu Aruba por presenta su mes cu forsa enfrente Gobierno di Reino, manera ya ta visibel den e forma cu hasta Senado Hulandes, ta cuestiona un Ministro y Parlamento Hulandes.
Esaki ta sumamente importante awor pa Aruba y DIARIO ta revisando tur documento hunto cu expertonan den cual Aruba y otro paisnan den Reino a bini dilanti den exposicion di politiconan Hulandes.
Pa loke ta trata Geert Wilders, informantenan a mustra riba su confrontacion recien cu cu e dirigente di Partij van de Arbeid, Timmermans, cu a wordo acusa den seno di Parlamento Hulandes, di socialismo falso (Nep Socialisme) pa e forma cu el a ricibi entrada enorme di wachtgeld, pues pago den su tempo di espera, cu e no tabata tin su entrada costumbra.
Un asunto cu di ningun forma por ricibi excusa, aunke opositornan di Wilders a trata di haci esaki, a pesar di e hecho cu ta trata aki hustamente di uno di e problemanan mas grandi cu politiconan tin cu votadornan.
E progreso di Wilders manera a bini dilanti ta basa pa un gran parti riba e forma cu politica ta bira productor di bienestar pa politiconan, manera na tanto ocasion DIARIO a adverti tambe na Parlamento.
Informantenan a indica cu Geert Wilders hustamente tin su forsa den argumentonan cu DIARIO hopi biaha a presenta den e forma cu den servicio di Pueblo, politiconan ta gasta mucho mas cu ta normal ora e gastanan mester wordo haci den sector priva.
Uno di e forzanan grandi di Wilders ta cu e ta compara loke un simpel trahador ta gana cu loke politiconan pa medio di nan trabou den Parlamento ta gana.
Informantenan di DIARIO ta considera di gran importancia cu Gobierno di Aruba ta e unico Gobierno den Reino Hulandes, cu por papia di e forma cu el a deshaci di falta di placa pa un saldo positivo, pues placa cu e resta, ora kita tur gasto for di entrada di e pais.
Manera a wordo mustra na DIARIO, un Gobierno dirigi pa Geert Wilders lo bay presenta exigencianan enorme pa paisnan den Caribe, cu tin un gobernacion cu Geert Wilders ta cualifica na forma sumamente denigrante den publico.
Na e momentonan aki politica na Aruba mester ta na defensa di Aruba, mescos cu na e momentonan aki por nota cu na Hulanda sosten ta wordo duna na alcansa un rumbo nobo pa e pais den un situacion mundial sumamente dificil.
