Parlamentario Ricky Hoek (MEP):
*Entrante 1 di maart 2024 e lo ta na vigor
ORANJESTAD (AAN): Desde Segunda Guera Mundial, Nacionnan Uni a bin cu e Tratado pa Derechonan di Mucha. E muchanan ta esnan cu a sufri hopi durante di e guera. Despues a bin situacionnan caminda e muchanan mester a traha, nan no tabata tin scol y tabata tin scarcedad di cuido. Relaciona cu esaki, Nacionnan Uni a bin c'un Tratado y ta un Tratado cu tur pais na mundo a ratifica.
Den cuadro di e celebracion di Dia Internacional di Derecho di Mucha, Parlamentario Ricky Hoek di Fraccion di MEP, a trece e tema aki ariba mesa den rueda di prensa. Hoek a indica cu door di e Tratado aki ta mira e importancia pa traha na bienestar di e muchanan.
Na 2001, Aruba a ratifica e Tratado Internacional di Derechonan di Mucha "y esey ta nifica cu gobierno tin e compromiso pa traha na bienestar di e muchanan, pa sostene nan y guia nan na tur momento pa nan por tin un bon futuro", e Parlamentario a expresa.
Diamars, Parlamento di Aruba a pasa un ley sumamente importante y esaki ta un ley nobo cu Aruba no tabata conoce antes, a remarca. E ley aki yama 'bevordering voortgezet ouderschap en zorgvuldige scheiding' cu na Papiamento e ta conoci como 'Plan di Mayor'.
E ta encera cu na momento cu e mayornan dicidi di divorcia of separa nan tin cu bay traha un plan di mayor con nan ta bay sigui cu e educacion y e guia di e yiu of yiunan.
Prome cu haci un peticion di divorcio na corte, hues ta bay bisa cu e mayornan mester bin c'un plan, den cuadro di esaki. Hopi biaha no ta facil yega na un plan y antes tur cos mester a bay segun veredicto di hues.
Pero cu e ley aki, prome cu yega asina leu cu e parehanan ta bay divorcia, mama y tata mester sinta hunto pa traha un plan specifico pa e mucha. Ora cu e mucha tin 12 aña e tambe por ta particip’e den e plan aki, y bisa den ki forma e lo por ta den contacto cu su mayornan y cu ki palabracion e ta sinti mas miho cu ne. E plan aki lo haci cu e caminda pa cana lo ta mas facil, na bienestar di un y tur, pero principalmente di e mucha. E lo ta tambe menos traumatico, Ricky Hoek a enfatisa. Ora cu e divorcio tuma lugar, hues lo aproba e plan tambe y asina ta sigui cu e guia di e yiu pa ambos mayor.
E ley no ta solamente pa parehanan casa
"Ta importante pa menciona cu e ley aki no solamente ta parehanan casa, pero tambe pa parehanan cu no ta casa, pero si cu a reconoce e yiunan of cu tin un status legal manera geregistreerd partnerschap manera nos conoce tambe", Hoek a declara.
El a remarca cu por presenta tambe casonan dificil caminda e mayornan no por sali afo y yega na traha un plan hunto. Pa esaki Gobierno di Aruba a bin cu e iniciativa di pone un mediador, cu ta un persona specialisa cu ta bay yuda e mayornan stipula un plan.
Ley Plan di Mayor ta bay cay bao di Directie Voogdijraad. E ley no ta bay costa Aruba mucho placa ni tampoco ta bay bin ningun departamento nobo, manera oposicion a sugeri den reunion di Parlamento.
E base di e ley aki ta e 'Sociaal Crisis Plan' y riba esaki Gabinete Wever-Croes 1 y 2 a bin ta trahando tambe na bienestar di e muchanan pa medio di diferente otro proyecto manera e ley di Kinderopvang, Departamento di Mucha y Hoben y e Family Justice Center, cual ta birando un realidad.
A bin ta trahando riba Plan di Mayor for di 2020 y diamars e ley a haya sosten unanime den Parlamento di Aruba. Entrante 1 di maart 2024 e ta drenta na vigor.
"Nos ta felicita Sra. Michella Steenvoorde-Lacle cu a bin cu e iniciativa di ley aki. Minister Rocco Tjon, Minister di Asuntonan Social cu tambe a kere den e proyecto aki y a presenta e ley na Parlamento y tambe na tur colega di Parlamento cu a aproba e ley aki", asina Parlamentario Ricky Hoek a finalisa bisando.
