Aruba mester cuida su naturaleza riba tera y bao awa tambe: e ta hopi importante

Dr. Eric Mijts di Universidad di Aruba:

ORANJESTAD (AAN ) Durante e Conferencia tocante cambio di clima, Dr. Eric Mijts, docente y coordinador na Universidad di Aruba di e Area di investigacion “Research Center”, den un entrevista cu DIARIO, a comenta tocante e tema di e conferencia aki.

El a menciona cu tin tres dia di conferencia y tin hende cu ta bin for di Pacifico, Atlantico, Canada, Merca, Malta, Europa, pa e conferencia multidisciplinario aki, unda ta bay discuti riba e tema di “Islands Knows”, kiermen enfoca riba e cosnan cu e habitantenan di un isla ta biba y di ki manera por traha e resiliencia, mas grandi, pa e islanan.

Dr. Mijts a bisa cu esaki ta e di dos conferencia cu ta tuma lugar na Aruba, tambe na Universidad. E prome tabata na 2019, hunto cu University of Prince Edward Island, unda tin UNESCO Chair in Island Studies & Sustainability, y esaki ta e di dos conferencia riba e tema aki.

Mijts a señala cu nan ta experto den esaki, y pesey nan ta sigur cu ta e Islanan chikito, cu ta riba e front line di e cambionan climatico, y nan ta mira nan mes como e “front line workers” di e investigacionnan riba e cambionan di clima den e Islanan Chikito.

El a splica cu e Islanan tin retonan diferente: “Bo ta wak energia, awa, cuminda, tur cos ta bao di presion, pero tambe nos naturaleza. Nos naturaleza, nos ambiente, ta un problema grandi cu nos mester wak. Tin hopi persona di exterior, pero tambe di interior, y nos ta wak e influencia di esey riba nos turismo”, Dr. Mijts a señala.

El a agrega cu Aruba su turismo ta bay man den man cu e naturaleza. “Hendenan ta bin pa experiencia e naturaleza di Aruba, anto nos tin cu haya manera di cuida nos naturaleza, nos ambiente, y haci esaki ta hopi importante”, el a subraya.

Dr. Mijts a señala cu Aruba ta riba un bon caminda cu un parke nacional riba tera, pero nos tin un lama grandi, cu ta hopi importante tambe. “Un di e aspectonan cu mi ta bay presenta riba e tema ey, ta cu nos mester busca e manera di proteha e naturaleza bao di awa tambe”, Mijts a remarca.

El finaliza bisando cu ta pa nos tur di cuida e futuro, locual Aruba tin como medio ambiente. Kiermen, e ta un tarea pa tur hende y “ora cu we care” nos por bay dilanti cu ne, Dr. Eric Mijts a trece dilanti.