Elmar a haci trabao di mantenimento riba wayanan rond Aruba

ORANJESTAD (AAN): E compania di electricidad NV Elmar ta ehecutando su meerjarenplan di mantenimento den tur distrito na Aruba.

   Recientemente, nan a finalisa trabaonan den e areanan di Weg Fontein na San Nicolas, Tanki Leendert, Piedra Plat y Casibari, Pos Abou y Bubali, Rooi Afo y Babijn, Canashito y Hooiberg, Oranjestad, y awor ta toca e turno back den San Nicolas. Den simannan venidero, nan ta sigui na Santa Cruz.

   E trabao di e Team di Overhead Services ta inclui e reemplazo di diferente componente riba e red, pa asina fortifica e grid di coriente. Alavez e Team di Facilities ta ehecutando trabao di mantencion riba e transformerhuis cu ta distribui coriente den e area aki.

   Pa logra e trabaonan aki, ta necesario pa temporalmente interumpi e servicio di coriente pa proteha e seguridad di tecniconan. E compromiso ta firme pa sigui brinda un servicio di coriente di calidad.