Alumnonan di Mon Plaisir tambe interesa den Atardi Informativo di awe

ORANJESTAD (AAN): En conexion cu e proyecto di Studentenkamer, Minister Endy Croes ta bishitando diferente scol secundario na Aruba pa invita e alumnonan di voorexamenklas y examenklas pa un atardi di informacion.

Diamars mainta, Mandatario di Enseñansa a bishita Mon Plaisir College Havo & Vwo na Dakota. Mandatario di Enseñansa y Deporte tabatin e oportunidad pa combersa un rato cu e studianten alavez a invita e studiantenan di examenklas cu ta desea pa continua cu nan estudio na Hulanda pa un atardi dedica na nan.

   E sesion informativo aki ta tuma lugar awe Diaranson 25 di october 2023 na The Movies na Gloria. Esaki ta di dos aña consecutivo cu ta organiza e proyecto aki. Durante e sesion informativo lo tin diferente profesional cu lo brinda informacion di, entre otro, alohamento (huisvesting) na Hulanda. Arubahuis y Departamento di Enseñansa di Aruba lo ta presente pa contesta pregunta relaciona cu estudio na Hulanda.

   Ademas, lo tin un presentacion di Señora Paloma Osorio di Fundacion Plan di Bida pa educa e alumnonan tocante maneho di presupuesto y Realign Caching, Consultancy & Services di Señora Liseanne Sambo-Gomez cu lo trata e topiconan: escogencia di estudio y con pa yena e formularionan.

   Minister Endy Croes a indica cu e meta di e sesion informativo aki, ta pa yuda y motiva e alumnonan inscribi pa camber na tempo, mirando cu si bo no tin un vivienda na Hulanda, e studiante no por haya un BSN nummer y consecuentemente no por habri un cuenta na banco y/of no por inscribi pa scol. Minister Endy Croes a indica cu esaki ta un problema grandi pa e studiantenan cu ta continua cu nan estudio na Hulanda. Minister Endy Croes kier evita pa e studiantenan pasa den e proceso aki y cu esaki perhudica nan estudio na Hulanda.

Pa conclui, Minister Endy Croes ta gradici Señora Richelle Noël, docente- y alumnonan pa e caluroso recepcion.