Aruba Lions Club a ricibi delegacion di un club di Boston

ORANJESTAD (AAN): Recientemente Aruba Lions Club tabatin e honor di a ricibi un delegacion distingui di

St. Lawrence Lions Club di Boston na estado di Massachusetts na Merca.  Esaki den un encuentro oficial cu a tuma lugar riba den e Lion’s Den di e club na Aruba.

   E programa, cuidadosamente organiza, a tuma lugar entre 6:30 pm y 8:30 pm. Durante e anochi, ambos club a comparti momento significativo, yena di alegria, harimento y camaraderia. Regalonan a wordo intercambia como simbolo di amistad y union, reforzando e lazo di cooperacion y fraternidad entre e dos organizacionnan Lionistico.

   Na conclusion di e actividad, e delegacion bishitante a expresa nan profundo agradecimento pa e forma excepcional den cual nan a wordo ricibi. Nan a destaca cu, aunke nan a bishita hopi otro isla den Caribe, esaki tabata e prome biaha cu nan a experencia un nivel tan halto di calidez, bondad y hospitalidad sincero. Den esey, nan a invita Aruba Lions Club pa haci nan un bishita na Boston den futuro cercano.

   Aproximadamente na 8:15 pm, e grupo a sali den bus pa bolbe na Waf, caminda nan a prepara pa aborda e cruise ship Carnival Horizon, cu tabata programa pa sali for di Aruba na 10:00 pm.

   Aruba Lions Club ta sigui compromete cu promove union, servicio y amistad internacional, fortaleciendo lazo cu clubnan Lionistico rond di mundo.