Aruba Investment Summit mester yuda den diversificacion di e economia

ORANJESTAD (AAN): Minister di Finanzas, Asuntonan Economico y Cultura Xiomara Maduro Diaranzon durante un conferencia di prensa a papia riba Aruba Investment Summit 2021.

E mandatario a trece dilanti cu for di prome cu e pandemia caba e gobierno aki a bin ta traha riba e parti economico di nos pais.

“Nos a haci hopi trabao pa busca e progreso economico di nos pais, buscando tambe kico ta e oportunidadnan ainda pa desaroya economia di pais Aruba y diversifica esaki”.

Hopi biaha hende ta cuestiona kico concretamente ta wordo haci riba e tereno di diversificacion, pasobra nos ta depende di turismo, segun Maduro.

El a sigui bisa cu Aruba tabata tin tambe un otro pilar, esta e refineria, pero cu tempo e industria aki a wordo bandona y nos a keda cu turismo.

“Nos a cuminza haci trabaonan pa pone e fundeshi, pa asina nos por bay sigui diversifica economia di pais Aruba”.

Den cuadro di esaki nos ta organiza un conferencia (‘summit’), esta Aruba Investment Summit 2021:Creating Wealth in Aruba, cu ta bay ta un conferencia virtual.

Asina nos ta bay purba atrae inversionistanan, segun Maduro.

El a splica cu na 2019 gobierno pa prome biaha a produci pa Aruba un poliza economico, unda cu pa prome biaha den historia di pais Aruba a compila kico ta bay ta e maneho economico di Gobierno pa locual ta e añanan 2019 te cu 2022.

“For di esaki tambe a nace locual ta bira e strategia cu nos ta bay uza pa por atrae e inversionnan necesario pa pais Aruba, unda cu e plan ta pa 2019 te cu 2024”.

E ‘economic policy’ aki ta un plan cu ta transcende gobernacion, pasobra  eta un plan pa beneficio di Aruba henter, segun e mandatario.

E minister a indica cu den poliza aki a identifica cua ta e 6 sectornan di cual Aruba por diversifica su economia.

E sectornan aki a wordo identifica hunto cu stakeholders na nos pais, bao di guia di un moderador internacional e tempo ey.

“E 6 sectornan prometedor ta inclui turismo y dentro di  turismo mes por diversifica den cierto mercado”.

Otro sector ta esun di conocemento, unda cu por ehempel por cuminza un facultad pa duna matematica of ingenieria, pero tambe pa crea un centro di excelencia cu por yuda nos exporta conocemento, segun Maduro.

El a splica den e parti di hub tin hopi oportunidad pa Aruba, mientras cu nos isla por diversifica den agricultura.

Banda di esaki tin e industria creativo cu ta uno hopi prometedor.

Pa atrae inversionistanan pa yuda den tur esaki, a organiza e Aruba Investment Summit cu ta bay tuma lugar dia 31 di Mei, 1 di Juni y 2 di Juni.

Ta bay tin mas cu 10 topico y mas cu 10 hende cu ta bay duna nan presentacion.

“E cumbre ta uno  virtual y pesey mester registra pa esaki”.

Ya caba tin mas cu 100 participante registra, di entre otro Merca, Colombia, Canada  y Hulanda, segun e mandatario.