ORANJESTAD (AAN) — DIARIO a adverti cu e caminda pa eleccion 2021 lo tabata cubri cu lodo cu mester a wordo produci dor di un partido cu ta sigui permiti su mes wordo uza dor di Mike Eman.
Ta un berguensa pa mira con, sin ningun argumento sano, ta trata di lastra Prome Ministro Evelyn Wever-Croes den lodo pa asina cubri berguensa di partido AVP cu no tin curashi pa pone su propio cas na orden y bisa Mike Eman cu ta basta cu manipulacion barata.
Awe husticia ta exigi DIARIO lanta para y pone un fin na abuso cu ta wordo haci riba tereno politico dor di un partido, cu ta AVP, cu ta maestro den manipula sentimento humano pa Emanismo por continua.
Kico ta Emanismo? E pensamento cu pasobra un hende a nace cu un fam, e por haci y deshaci manera e kier y keda na poder di un pais cu a lucha pa logra loke Emanismo a aborta, cu ta e Status Aparte, e autonomia di Aruba cu awe ta haci posibel pa Aruba sigui cana.
Ta tristo cu na un pais democratico, cu no por conoce privilegio di ningun clase, Emanismo ta sigui cu atentado contra tur loke por pone Emanismo na poder pa asina Aruba bira un herencia di loke a descalifica nan mes como lider.
DIARIO ta testigo, y por publica rapport tras di rapport cu a wordo publica for di 2018, con Evelyn Wever-Croes a traha pa pone Aruba atrobe riba un caminda di sobrevivencia.
DIARIO na 2018 mester a raporta con Evelyn Wever-Croes tabata tin e balentia di tuma medidanan cu Aruba tabata tin mester despues cu Mike Eman (manera rapportnan ta trece bon cla dilanti) a laga un Aruba destrui atras.
No tin nada di Aruba cu a keda riba pia ora Mike Eman a bay sconde na 2017.
Economia di Aruba tabata un pregunta grandi den e trampa cu el a laga atras cu yama Citgo. Astucia di Mike Eman a bini dilanti den e forma cu el a evita cu Parlamento y Pueblo lo a tuma nota di e acuerdo cu el a firma cu Nicolas Maduro pa e por sigui haya voto.
Berguensa ta hancra den un rapport di proyectonan den cual Mike y Benny a spart placa di Pueblo sin clemencia.
Hulanda ta practica mentira? DIARIO ta practica mentira? IMF ta practica mentira? Pakico nan lo practica mentira contra Mike Eman?
Un cos sigur Emanismo ta experto aden. Tira lodo. Destrui pa hende no mira berdad!
Ta un berguensa con na 2014 dokternan specialista a core pa un politico manipulador manera Mike por a sconde tras di un welga di hamber y laga cara di Aruba na berguensa.
Mike a laga otro miembronan di su partido bira ridiculo den su show, cu awe e kier tapa cu lodo cu e ta tira riba otro.
DIARIO ta lanta para pasobra DIARIO tin e deber di informa Aruba segun berdad pa Aruba dicidi kico e ta haci cu su futuro. Pasobra ni bida di Arubiano Mike ta respeta mientras e ta trapa riba reglanan cu rond mundo ta wordo mantene pa evita cu e pandemia ta causa mas morto.
Mientras Mike Eman tabata sconde pa no enfrenta responsabilidad pa e desaster cu el a laga atras pa Wever-Croes atende, Aruba tabata trankil y hunto Aruba a evita cu e pais lo a zink.
Pero awor Mike a bolbe. Maestro den lodo pa e por crea su shownan e ta ataca atrobe.
Berguensa nacional pa mira hende cu ta yama nan mes profesional ta sigui un homber marca pa 12-8! Un homber figura tristo, cu mester tira lodo pa hende no mira su cueba di berguensa.
For di 2017 DIARIO continuamente ta na careda. Tur dia Evelyn Wever-Croes a produci algo nobo. Algo alentador pa Aruba. Esaki nos mester sostene hunto cu tur politico di buena fe cu ta demostra kico nan por haci pa Aruba y no ta basa nan mes riba e principio di Emanismo cu ta crea trono pa destructor di e nacion, manera sigur ta e caso cu Mike!
