ORANJESTAD (AAN) — E cifranan 12-8 tin un nificacion grandi pa e Arubiano, cu a conoce e anhelo legitimo di Aruba pa libertad, pa autonomia di su pais.
Ta e anhelo aki a haci cu Arubianonan a scoge Henny Eman durante e prome parti di Siglo 20 como nan lider pa hiba e lucha di separacion for di Antia Hulandes.
Na 1941 Henny Eman a wordo eligi como miembro di Staten di Colonia Curacao, e nomber di e gruponan di isla Antia Hulandes cu a nace na 1954, tabata wordo yama.
E nomber Colonia Curacao ya tabata indica cu no tabata tin igualdad den e status di e islanan cu tabata forma Antia Hulandes.
Henny Eman cu tabata welo di entre otro Mike Eman, mester a defende e interesnan di Aruba y e lucha pa separacion cu Aruba a confia den su man.
E tempo ainda Aruba no tabata conoce su Eilandsraad caminda e lo por a atende su propio asuntonan y cu a wordo introduci na 1951.
Tabata na 1954 cu Statuut a wordo introduci pa regla e relacionnan entre Hulanda, Antia Hulandes y Surinam. Asina Antia Hulandes a mira luz y Aruba a bira parti di Antia Hulandes pa cual mester a yega na cierto areglonan.
Uno di nan tabata e cantidad di miembronan pa cada isla den e Parlamento di Antia.
Na 1948 un Staatsregeling pa e islanan den Caribe a mira luz y a wordo dicidi cu Curacao y Aruba cada uno lo tabata tin 8 representante den Parlamento di Antia Hulandes.
Dia 18 di maart 1948 yiu di Henny Eman y tata di Mike Eman a entrega na Reino e mocion pa Aruba separa for di Antia Hulandes. Na 1947 ya 2147 Arubiano a firma e documento pa sostene e anhelo di separacion.
E deliberacionnan a continua pero den Staten di Antia Hulandes, e miembronan no por a yega na un decision y Hulanda a cuminsa lansa proposicion.
Decision, sinembargo, a cay cu e asina yama Interimregeling cu a haci cu Aruba a perde su igualdad cu Curacao den Antia Hulandes. A dicidi cu ta introduci un representacion di Pueblo di Antia Hulandes a base di e cantidad di habitante.
Cu e interimregeling e reparticion di asiento den Staten, cu na 1954 a bira Staten di Antia Hulandes (den cual Aruba a keda mara na Antia Hulandes) a bira 12 asiento pa Curacao, 8 pa Aruba, 1 pa Bonaire y 1 pa Isla Ariba.
Na 1957 Henny Eman a muri y e partido AVP a sigui bay atras. Na 1967 e tata di Mike Eman, Shon A Eman, a muri.
Na 1971 Betico Croes a lanta su propio partido despues cu AVP a rechasa su persona como lider pasobra e no tabata “Eman”. Tabata Betico Croes cu a duna bida na separacion for di Curacao a base di e concepto di Status Aparte cu el a introduci y cu mester a conduci na autonomia di Aruba segun deseo di Aruba.
12-8 a keda atras como marca di traicion di e deseo di Aruba y sigur dos cifra cu tabata causa un sabor negativo pa e Arubiano.
Na 1983, despues di un lucha fuerte dirigi pa Betico Croes, finalmente Aruba a haya su autonomia den cual e Florin Arubano y Ministerio Publico tabata e dos pilarnan importante pa un Pueblo autonomo den Reino Hulandes.
E Florin Arubano cu tabata exigencia di Betico Croes, den e lucha cu no tabata tin sosten ni di AVP ni di PPA, a duna base pa Aruba hiba su propio maneho financiero y economico.
Ora na 2009 a bira conoci cu Mike Eman a gana eleccion cu 12-8, den hopi cas na Aruba pensamentonan a bolbe na pasado.
Mike Eman a ciega Aruba cu su plan pa deshaci di BBO, cu a wordo introduci como belasting indirecto den reforma di belasting manera ta wordo confirma den tur documento. E forma acumulativo di BBO, tabata loke a causa malcontento na Aruba ora el a drenta na vigor.
Mike Eman a probecha di e malcontento cu BBO pa lansa su maneho, cu a dal Aruba e prome golpe mortal ora Aruba na 2009. Na 2010 e suma cu Aruba a ricibi a base di mita BBO, tabata casi 100 Miyon menos.
Mike Eman a sigui subi e debe nacional y a introduci e proyectonan PPP.
Na 2014 Hulanda a presenta pa deshaci di e autonomia financiero di Aruba y Mike a tene un huelga di hamber di cual Reino a haci caso omiso y Aruba a perde su autonomia pa dicidi riba su maneho financiero.
Na vispera di un eleccion nobo, Aruba ta lucha pa su recuperacion y pa regreso di su autonomia cu Mike Eman a destrui!
