Aruba hunto cu ocho pais di Caribe a lansa Caribbean Adaptive Sports Alliance

ORANJESTAD (AAN):  Diadomingo 24 di Augustus 2025, a tuma lugar e lansamento oficial di Caribbean Adaptive Sports Alliance (C.A.S.A.) na Grenada.

Ocho pais — Aruba, Barbados, Grenada, Guyana, Jamaica, St. Vincent & Grenadines, Surinam y Trinidad & Tobago — a uni nan forsa pa duna mas poder y visibilidad na deporte adaptivo den region.

Cu e union aki, C.A.S.A. ta propone inclusion, acceso na recurso, training y mas oportunidad pa atleta cu limitacion. Su logo ta simboliza e spirito di Caribe: solo, lama, naturalesa, pasion y union.

E lansamento lo ta atendi pa figura internacional manera Andrew Parsons, Presidente di e International Paralympic Committee (IPC), y Julio César Ávila, Presidente di e Americas Paralympic Committee (APC), cu ta resalta e balor mundial di e iniciativa aki.

C.A.S.A. ta un paso historico cu ta habri un futuro nobo pa deporte adaptivo den Caribe: un cas pa tur, construi hunto, y trahando pa un mihor futuro pa atletanan cu limitacion den Caribe.