Proceso di legalisacion y evaluacion ta tumando lugar hunto e gremionan
ORANJESTAD (AAN) – Minister di Husticia, Arthur Dowers, den entrevista cu DIARIO a señala cu mester tin un bon balansa pa loke ta e mercado laboral y e vacaturanan cu tin, pasobra e idea no ta pa otorga trabao na tur hende di afo, y laga nos localnan sin trabao.
E proceso cu ta tumando lugar pa legalizacion ta wordo realisa conhuntamente cu e gremionan, y nan lo evalua y wak si e presion ta bira grandi na cierto caminda. E idea ta pa aumenta e cantidad di hende cu por drenta e mercado laboral, pasobra tabata tin prohibicion pa traha, pero tur hende ta bin liber awo pa bay mercado laboral tambe.
“Y nos por duna nan e chens tambe, pa den e periodo aki si nan ta liber nan por drenta den e mercado. Mi ta haci un apelacion riba e dunadornan di trabao presenta na e momentonan aki y bisa cu nan ta buscando hende.
Anto, e ora ey nan tin chens cu den e periodo ey, hendenan cu ta akinan caba por meld akinan. Nos tin cu haci un esfuerzo grandi, conhuntamente, cu otro pa resolve un problema cu a wordo crea pa tempo largo. Nos mester bay na e momento aki purba crea un ‘easy wake out’.
No ta facil pa ningun di nos, pero nos tin confiansa cu nos ta traha di buena Fe y confiansa cu otro, nos ta spera tambe cu esey ta e proceso cu lo wordo hiba y cu na final por conta tambe”, Minister Arthur Dowers a subraya.
