Minister di Husticia Artur Dowers:
ORANJESTAD (AAN) – Minister di Husticia, mr. Arthur Dowers, den entrevista cu DIARIO, a duna di conoce cu gobierno ta bay cuminsa cu e di tres fase, di e proceso pa duna personanan indocumenta, e oportunidad di legalisa nan mes.
E mandatario a señala cu nan ta mira, den e ultimo periodo, cu tin hopi peticion pa personanan traha den housekeeping, y den su concepto e personanan cu por haci esaki ta na Aruba sin documento y sin trabao.
“Y nos a pone na e momentonan aki e oportunidad pa nan por tuma e personanan aki den servicio, y nos a bisa tambe cu durante e prome luna nos ta evalua e proceso. Na e momentonan aki, nos ta laga e proceso cana su caminda, nos ta evalua despues di e luna aki, y a base di esey nos ta wak con pa adapta e maneho aki.
E punto di salida ta, en todo caso, cu bo kier percura cu tin suficiente hende pa traha, y cu tur hende cu ta bay traha aki na Aruba cana e proceso legal, y cu nan ta cumpli tambe cu nan obligacionnan fiscal, cu cada un di nos tin, segun nan forza”, Minister Dowers a señala.
