Aruba Fair Trade Authority a bira un realidad

Minister Geoffrey Wever: 

*Un autoridad di competencia husto pa Aruba su economia 

ORANJESTAD (AAN): Durante un conferencia di prensa Diahuebs, Minister di Asuntonan Economico, Comunicacion y Desaroyo Sostenibel Geoffrey Wever a elabora riba e topico di Aruba Fair Trade Authority (AFTA).

E mandatario a anuncia cu e autoridad di competencia husto pa Aruba su economia, e asina yama AFTA a bira un realidad.

“Esaki ta un momento importante pa economia di Aruba y mi ta convenci cu mescos cu tur e expertonan cu a yuda nos den esaki, cu AFTA lo trece cambionan importante y  structural pa nos economia, nos comerciantenan y pa tur ciudadano”, segun Wever.

El a sigui bisa cu AFTA ta un entidad huridico independiente basa riba ley, cu tin como tarea principal pa crea un nivel husto di competencia, liber y sin restriccion pa tur compania na Aruba, stimulando asina inversion.

E mandatario a indica cu Aruba Fair Trade Authority ta contribui na prijsnan mas barata di producto y servicio y mihor producto y servicio pa nos consumidornan.

“Mayoria pais desaroya rond mundo ya tin un organo manera AFTA cu ta evita cu tin abuso riba e consumidor y awe Aruba por ta orguyoso y contento cu e tambe tin e autoridad di competencia husto, cu AFTA”.

Como minister encarga cu economia mi lo ta encarga cu e maneho di e autoridad aki, pero ATFA ta un organo independiente basa riba ley, cu ta encarga cu implementacion y distribucion di e ley, segun e mandatario.

El a sigui bisa cu AFTA no por a bira un realidad si no ta pa e trabao, dedicacion  y insistencia di Departamento di Asuntonan Economico.

Pesey el a gradici en especial tambe director di e departamento.

Tambe e mandatario a gradici su coleganan minister, cu a yuda aloca fondonan pa por implementa e AFTA.

“Mester reconoce tambe e rol importante cu Hulanda tabata tin den e proceso aki, mirando cu Hulanda a aproba y a kere den e proyecto aki, unda cu e gobierno a aloca 620 mil florin pa yuda cu AFTA y a pone na disposicion di Aruba e experto  Albert Scholten, cu ta bay ta encarga cu implementacion di AFTA”, segun Wever, kende a sigui bisa cu Scholten ta bay ta e persona pa guia e profesionalnan local pa set up e AFTA.