ORANJESTAD (AAN) – Minister Presidente Evelyn Wever-Croes a splica den conferencia di prensa,
cu a tuma lugar Diahuebs den Futura, cu awo e cosnan a bira un poco diferente pa e aña escolar aki, y pesey el a anuncia e proyecto nobo.
Pa e aña escolar cu a caba di cuminza, gobierno a tuma e decision di laga scolnan mes pa bin cu nan ideanan innovativo y creativo, pa nan diseña, aplica y ehecuta e proyectonan piloto cu nan mes bin cune.
“Pesey, awe nos ta lanza e proyecto, cu ta un fondo di tecnologia den educacion, cu nos ta yame ‘EduTech Fund’ y e ta bay wordo reparti entre cuater diferente ciclo. E prome ciclo ta cuminza awe, y entrante awe tur scol ta wordo invita durante dos luna pa entrega nan plan. Abo tin cu bo proyecto, trahe di tal forma, abo ta submit bo idea, anto un comision independiente ta evalua tur e peticionnan cu drenta, y nos ta pone pa cada ciclo 100 mil florin disponible. Kiermen, pa cuater ciclo ta bira 400 mil florin pa e aña escolar aki, cu tur scol por inscribi. Bo mes por submit bo idea y asina abo por bin na remarca pa e proyecto di innovacion pa bo scol”, e dignatario a duna di conoce. E mandatario a acentua cu esaki no ta un invitacion of yamada solamente pa e cabesante, pero na cabesante, maestro, y alumnonan di scol basico y scol secundario.
“Si bo tin un idea innovativo pa bo scol of bo klas, papie cu bo maestro y cu bo cabesante, anto abo tambe por bin cu idea pa asina bo por trece y entrega bo idea”, Minister Presidente a agrega.
“E ta un invitacion tambe na mayornan, pasobra cuanto biaha nos ta desea pa nos tin cosnan mas innovativo pa nos yiunan por haci na scol. Cuanto biaha nos ta keha cu e mucha ta hopi bon den computer na cas, pero na scol no tin hopi oportunidad. Pues, como mayor, akinan bo tambe tin oportunidad; claro, abo como mayor no por manda e peticion, bo tin cu hacie a traves di e maestro y e cabesante”, Minister Presidente a acentua.
