Un pleister di 14 pa 16 Miljard Euro pa e frena desaster social na Hulanda
*Prijs di combustibel na clima friu a pone Gabinete Rutte na careda
*Miles di cupo di trabou por wordo poni na peliger enfrente un recesion
ORANJESTAD(AAN)—Na momento cu tur bista na Aruba tabata fiha riba e confrontacion entre CAFT y Aruba, cu a pensa pues cu por a wordo transforma pa un confrontacion entre Gobierno di Reino y Aruba, DIARIO a mustra riba e hecho cu Gobierno Hulandes mes tabata den un situacion sumamente serio ya cu e Guera di Ukraine tabata tin un impacto mucho mas fuerte riba e poder di compra di e Pueblo Hulandes cu riba e Arubiano.
Un asunto cu sigur a hunga un papel y lo hunga un papel mucho mas grandi den e problemanan social na Hulanda, ta e hecho cu Hulanda tin un clima friu cu ta exigi combustibel.
Prijs di gas cu ta e combustibel importante pa confronta e clima friu, a subi drasticamente y a percura pa costo di bida na Hulanda a conoce un aumento cu e tempo ya tabata 10 porciento y awor ta alrededor di 15 porciento.
DIARIO a indica tambe cu Tweede Kamer Hulandes no a interumpi su vacacion pasobra Aruba no tabata di acuerdo cu Hulanda, pero pasobra Gobierno Hulandes tabata y te awe ta na careda debi na e hecho cu e calidad di bida a cay na Hulanda y pobresa a avansa na forma barbaro.
E cantidad di Hulandes cu a wordo directamente registra como “pober” pasobra nan no por cubri nan gastonan mas, no a wordo afecta pa e grupo cu ya mester a cualifica como pober, pero tambe pa e clase medio cu a mira su forsa di compra baha.
E costo halto di gas no ta problema solamente pa famia pero pa tur empresa y pa instancia cu un establecemento cu mester regla e temperatura, cu den e proximo lunanan lo exigi mas gasto debi na entrada di e temporada friu.
Con Gobierno Rutte lo a tende e asunto a bira importante pasobra, manera tambe DIARIO a splica Aruba, otro siman (e tercer Diamars di September), lo ta Prinsjesdag, e dia cu Rey Willem Alexander lo splica na Parlamento Hulandes, e plan di Gobierno di Reino pa 2023.
Ta riba Prinsjesdag tambe e maneho financiero lo bira conoci ora Gabinete Rutte entrega na e asina yama Miljoenennota (cifranan calcula) pa 2023.
A bira conoci cu den e cifranan aki, Gobierno Hulandes ta basa e recuperacion di poder di compra riba un aumento di e sueldo minimo cu 10 porciento, loke tin un impacto enorme riba mundo empresarial Hulandes cu mester atende tambe cu otro medidanan contene den e Miljoenennota cu ;lo bay exigi mas cu solamente e aumento di sueldo minimo pa e empresario.
Informacionnan di DIARIO, cu continuamente ta wordo confirma na nivel mundial, ta prueba di e red di contacto cu DIARIO tin na nivel halto cu varios pais y ta haci cu DIARIO por informa Aruba debidamente.
Informantenan a indica cu na Aruba no por copia e aumento di sueldo minimo cu Hulanda a introduci y cu ainda por bira problema serio na Hulanda sigur den un menasa di recesion mundial.
“Gobierno Hulandes a busca un solucion cu tabata directamente aplicabel y cu originalmente e kier a introduci den termino di tres aña. Awor, sinembargo, el a dicidi di bini sin mas cu un aumento di sueldo minimo di 10 porciento, cu lo mester wordo carga dor di mundo empresarial mescos cu dor di Gobierno cu ta bay uza alrededor di 15 Miljard Euro pa su asina yama Plan di Reparacion,” informantenan a indica.
Lo tin algun reparacion pa empresanan pero e meta di Gobierno Hulandes ta estilo di Robin Hood, cu lo por tin resultado pa Hulanda mes pero sigur na Aruba lo ta devastador.
Na Aruba, Reino Hulandes ta exigi pa Aruba baha su gastonan di Gobierno y incluso di personal. “Con lo por aumenta e sueldo minimo na Aruba cu 10 porciento y baha of mantene e entrada di e trahador di Gobierno abou?” a wordo trece dilanti.
Otro punto ta, cu un aumento di sueldo minimo lo subi tur prijs na Aruba, loke lo aumenta e inflacion pero directamente ta bira un menasa pa turista cu mester paga pa prijsnan mas halto.
DIARIO a discuti e asunto cu varios Arubiano, cu ta mustra cu ta deshaci di e posibilidad pa Aruba bini cu areglonan hopi riesgoso manera Hulanda a introduci.
Di otro banda mester tene na consideracion cu Aruba a gasta hopi placa y crea un debe nacional mientras Hulanda semper tabata tin problema pa gasta placa y Gobierno Hulandes a percura pa Hulanda tin placa y espacio pa produci e suma di 15 Miljard pa sostene su plan pa subi poder di compra sigur na inicio di e temporada friu, cu lo aumenta gastonan na forma barbaro.
DIARIO ta sigui vigila e desaroyonan pa informa Aruba.
